كەشە ەلىمىزدىڭ بياتلون سپورتى وداعىنىڭ پرەزيدەنتى ەرمەك قيزاتوۆتىڭ جەتەكشىلىگىمەن وداقتىڭ تارتىپتىك كوميسسياسىنىڭ كەزەكتەن تىس جيىنى ءوتىپ, كوميسسيا مۇشەلەرى الەم چەمپيوناتى قارساڭىندا اۋستريادا ءوتىپ جاتقان وقۋ-جاتتىعۋ جيىنىندا سپورتتىق رەجىم مەن ءتارتىپتى بۇزعان ءتورت سپورتشىنى قۇرامادان شەتتەتتى.
ۇلتتىق وليمپيادالىق كوميتەتىنىڭ حابارلاۋىنشا, تارتىپسىزدىگىنە بايلانىستى انتون پانتوۆ ءتورت جىلعا, تيمۋر كۋتس, ۆلاديسلاۆ ۆيتەنكو جانە رومان ەرەمين ءبىر جىلعا سپورتتان الاستاتىلدى. ولار ەندى بياتلوننان وتەتىن رەسپۋبليكالىق جانە حالىقارالىق جارىستارعا قاتىسا المايدى. قازىرگى ۋاقىتتا سپورتشىلاردىڭ بارلىعى جاتتىعۋ جيىنىنان ەلگە قايتارىلعان. شەشىمدى قابىلداۋعا بياتلوننان ۇلتتىق قۇرامانىڭ باس باپكەرى ماقسات شارانوۆتىڭ راپورتى جانە سپورتشىلار مەن باپكەرلەردىڭ تۇسىنىكتەمەسى سەبەپ بولدى. سونداي-اق وبەرتيللاح قالاسىنداعى وقۋ-جاتتىعۋ جيىنى كەزىندە كوماندا مۇشەلەرى تۇراقتاعان اۋستريالىق قوناقۇيدىڭ ارىز-شاعىمى دا نازاردان تىس قالماعان.