بىلتىر كۇزدە قازالى اۋدانىنداعى اۋرۋحانادا العاش رەت جۇرەك-قان تامىرلارىنا وتا جاسالدى. وسىعان دەيىن ءىرى قالالارداعى جابدىعى سايلى مەديتسينالىق ورتالىقتاردا عانا جاسالاتىن وتانى قورىقپاي قولعا العان قازالىلىق كارديولوگتاردىڭ بۇل ەڭبەگى ەرلىككە تەڭ ەدى. جابدىق دەمەكشى, قىمبات, ەڭ باستىسى ادام ساۋلىعىن ساقتاۋدا اسا قاجەتتى «انگيوگراف» اپپاراتى رەسپۋبليكا اۋداندارىنىڭ اراسىندا العاش رەت وسى قازالىعا قويىلىپ وتىر.
ارينە جابدىق قانشالىقتى جەتىلدىرىلسە دە ونىمەن ادام جۇمىس ىستەيدى. دەمەك, دەرتكە دارمەن تابىلۋى سول قىمبات قۇرىلعىنىڭ ء«تىلىن تاباتىن» دارىگەردىڭ بىلىكتىلىگىنە بايلانىستى. قازالى اۋرۋحاناسىنىڭ كارديولوگيالىق ورتالىعىنداعى دارىگەر-نەيروحيرۋرگ كەنەسارى باسپاەۆ پەن ونىڭ ارىپتەسى ايان قازي ۇلى ا.ن.سىزعانوۆ اتىنداعى ۇلتتىق حيرۋرگيا عىلىمي ورتالىعىنىڭ قايتا دايارلاۋ كۋرستارىنان ءوتىپ, بىلىمدەرىن جەتىلدىرگەن, وبلىستىق مەديتسينا ورتالىعىندا تاجىريبەلەرىن تولىقتىرعان.
– قازىر وسى اۋرۋحانا بازاسىندا جۇرەككە وتا جاساپ جاتىرمىز. نەگىزى كوروناروگرافيانىڭ باستى ماقساتى – اۋرۋدى ەرتە انىقتاۋ. وسى ورتالىق اشىلعان بىلتىرعى كۇزدەن بەرى 100-دەن استام وتا جاسادىق. ناۋقاستار وتادان كەيىن وسىنداعى 15 توسەكتىك كارديولوگيالىق بولىمدە جاتىپ ەم الادى, – دەيدى دارىگەر-نەيروحيرۋرگ كەنەسارى باسپاەۆ.
اۋداندىق اۋرۋحانا وسى ورتالىقتى اشۋعا 3 جىلداي دايىندالىپتى. ەڭ اۋەلى مۇنداعى دارىگەرلەردىڭ مەملەكەت تاراپىنان تەگىن بەرىلەتىن اسەرى كۇشتى «اكتيۆيزيە» پرەپاراتىن ءتيىمدى پايدالانعانى ەسكەرىلگەن. سول تۇستا وبلىستى باسقارعان قىرىمبەك كوشەرباەۆتىڭ باستاماسىمەن اۋدانداردا مەديتسينالىق كلاستەرلەر قۇرۋ ماسەلەسى كوتەرىلگەن كەزدە قازالى كارديولوگيالىق ورتالىق بولۋعا لايىق دەپ تانىلعان. وسىنىڭ ناتيجەسىندە قازىر وبلىس ورتالىعىنان شالعاي جاتقان اۋدانداعى ناۋقاستار ەم ىزدەپ الىسقا سابىلمايدى. كارديوورتالىق قازالىمەن قاتار ارال, قارماقشى اۋداندارى, بايقوڭىر قالاسى تۇرعىندارى ءۇشىن قىزمەت كورسەتەدى. جالپى, شالعاي اۋدانداردا مەديتسينالىق كلاستەر قۇرۋ يدەياسى يگىلىكتى ءىس. مىسالى, قازالىعا كورشىلەس ارال اۋدانىندا اكۋشەرلىك ورتالىق اشىلىپتى. جاقىن اۋداندارداعى ناۋقاستاردىڭ ءبارى سوندا بارىپ قارالادى.
– جاڭاعى ايتقان «اكتيۆيزيە» پرەپاراتىنىڭ قان تامىرلارىنىڭ بىتەلگەن تۇستارىن ىدىراتىپ, اۋرۋدى بولدىرماۋعا تيگىزەر سەپتىگى كوپ. بىراق, كەرى اسەرى دە جوق ەمەس. قازىر «انگيوگراف» ارقىلى ناۋقاستى تولىق زەرتتەپ الۋعا مۇمكىندىك تۋىپ وتىر. كەيدە وعان پرەپارات سالۋدىڭ قاجەتى بولماي, ەمنىڭ باسقا ءتۇرى جاسالادى. ءدارى ەگىلگەندە دە وسى اپپارات ارقىلى ونىڭ اۋرۋعا اسەرىن كورىپ وتىرامىز, – دەيدى باس دارىگەردىڭ ورىنباسارى باقىتگۇل الىشەۆا.
دارىگەرلەردىڭ ايتۋىنشا, ينفاركت العان ناۋقاسقا 3-6 ساعات ارالىعىندا جاسالعان ەم جاقسى داريدى. «انگيوگراف» اپپاراتى ارقىلى ايىعىپ كەتىپ جاتقاندار وسىنىڭ دالەلى. ەڭ باستىسى, قۇرىلعى قازالىلىق كارديولوگتاردىڭ وزدەرىنە دەگەن سەنىمىن قالىپتاستىردى. بىلتىر وتانىڭ 4 ءتۇرىن جاساعان دارىگەرلەر الدا باسقا دا كۇردەلى وپەراتسيالاردى قولعا الماق.
قىزىلوردا