وبلىس اكىمى قۋانىشبەك ىسقاقوۆ بيزنەس-قاۋىمداستىق وكىلدەرىمەن كەزدەستى. جيىنعا جاس كاسىپكەرلەر, وسى سالاداعى مەكەمەلەر مەن ۇيىمدار باسشىلارى قاتىستى. بۇل تۋرالى وبلىس اكىمىنىڭ ءباسپاسوز قىزمەتى حابارلادى.
وڭىردە 2018 جىلدان باستاپ اۋىل تۇرعىندارىن تۇراقتى جۇمىسپەن قامتىپ, جۇمىسسىزدىقتى ازايتۋ, جەرگىلىكتى بيۋدجەتتى نىعايتۋ ماقساتىندا جاپپاي كاسىپكەرلىكتى دامىتۋدىڭ ۇشجىلدىعى جاريالانعان بولاتىن. وسى باستاما اياسىندا 2025 جىلعا دەيىن شاعىن جانە ورتا كاسىپكەرلىكتىڭ جالپى وڭىرلىك ونىمدەگى ۇلەسىن 35 پايىزعا جەتكىزۋ مىندەتى قويىلىپ وتىر.
ايماق باسشىسى وسى باعىتتا اتقارىلىپ جاتقان جۇمىستاردى سارالاپ, ءىرى كاسىپورىندار ءونىمى كولەمىن ۇلعايتىپ, سول ارقىلى ىلەسپە ءوندىرىس ورىندارىن قۇرۋ قاجەتتىگىن ايتتى.
- مىسالى, بىزدە كۇرىشتەن لاپشا, ۇن, ماي, سابانىنان قاپ شىعاراتىن كاسىپورىندار اشىلۋى ءتيىس. وزىمىزدەن ەكسپورتتالاتىن كۇرىش ونىمدەرى قايتا وڭدەلىپ, بىرنەشە ەسە قىمبات باعادا وزىمىزگە كەلىپ جاتادى. بۇدان بولەك, وڭىرىمىزدە اسىل تۇقىمدى مال ءوسىرىپ, شۇجىق جانە ءسۇت ونىمدەرىن ءوندىرىپ, ەلىمىزدىڭ ىشكى نارىعىنان ايتارلىقتاي ورىن العان كاسىپورىندار جەتەرلىك. بىراق بۇل شارۋاشىلىق اياسىندا ءجۇن, تەرى وندىرىستەرى مۇلدەم دامىماعان. ەلىمىزدە قولدانىستاعى زاڭنامالارعا ەنگىزىلگەن وزگەرىستەرگە سايكەس, 2025 جىلدان باستاپ پوليەتيلەن ونىمدەرى قولدانىستان شىعارىلماق. وسىعان سايكەس, پوليەتيلەن ءونىمىن الماستىراتىن ءوندىرىس كوزىن دامىتۋ قاجەت, - دەدى وبلىس اكىمى.
جيىندا ءوڭىردىڭ كاسىپكەرلىك سالاسىنا قاتىستى وزەكتى ماسەلەلەرگە وراي كاسىپكەرلەر ۇسىنىس-پىكىرلەرىن جەتكىزدى. جەڭىل ونەركاسىپ, ءبىلىم بەرۋ, مەديتسينا, تسيفرلاندىرۋ, ساۋدا جانە تۋريزم سالالارىنداعى پروبلەمالار تۋرالى ايتىلدى.
ايماق باسشىسى اكىمدىك تاراپىنان كاسىپكەرلىكتىڭ دامۋىنا قاتىستى ماسەلەلەردى شەشۋگە, يدەيالاردى ىسكە اسىرۋعا ءاردايىم قولداۋ بولاتىنىن اتاپ ءوتتى.