وتكەن دەمالىس كۇندەرى فرانتسيا استاناسى پاريجدە دزيۋدودان Grand Slam ءتۋرنيرى اياقتالدى. الەمنىڭ ەڭ ۇزدىك بالۋاندارى جينالعان دودادا قازاقستان كومانداسى ەكى مەدال جەڭىپ الدى. 60 كەلىدەگى ەلدوس سمەتوۆ قولا, 73 كەلىدەگى جانساي سماعۇلوۆ كۇمىس جۇلدەگەر اتانعان بولاتىن. ءبىراز ۋاقىتتان بەرى جەڭىس تۇعىرىنا جەتە الماي, كوپتەگەن تۋرنيرلەردە جۇلدەدەن قاعىلان جانساي سماعۇلوۆ Olympic.kz سايتىنا سۇحبات بەرىپ, ءدۇبىرلى دودانى قورىتىندىلادى. بۇل جايىندا ۇلتتىق وليمپيادالىق كوميتەتتىڭ ءباسپاسوز قىزمەتى حابارلادى.
«پاريجدەگى تۋرنير وتە جوعارى دەڭگەيدە ءوتتى. بۇل باسەكەدەن ماعان كۇمىس جۇلدە بۇيىردى. ەكى جىلدان بەرى جەڭىس تۇعىرىنان كورىنە المادىم. ياعني, بۇل مەنى ەكى جىل كۇتتىرگەن مەدال. تۋرنيردە جالپى ەسەبى جەتۋ كەزدەسۋ وتكىزىپ, فينالدا جاپوندىق سوچي حاشيميتوعا ەسە جىبەردىم. ارينە, بارلىق كەزدەسۋ دە وڭاي سوققان جوق. بىراق مەن ءۇشىن ەڭ قيىن بەلدەسۋ جارتىلاي فينالدا تاجىك بالۋانىمەن ءوتتى. ءبىر قۋانتاتىنى – ويلاعان ءادىس-تاسىلدەرىمنىڭ ءبارى ءساتتى شىقتى. پاريجدەگى باسەكە الدىندا اۆستريادا بىرلەسكەن وقۋ-جاتتىعۋ جيىندارىن وتكىزدىك. ال جارىس اياقتالعان سوڭ فرانتسيادا ءۇش كۇن جاتتىعۋ وتكىزىپ, ماروككودا وتەتىن گران-پري تۋرنيرىنە دايىندالامىن. مەنىڭ ەڭ ۇلكەن ماقساتىم – وليمپيادا ويىندارىنا ليتسەنزيا الۋ. ءبىزدىڭ سپورتتا ليتسەنزيا الۋ ءۇشىن رەيتينگىلىك ۇپايلار جيناۋ قاجەت. سول ءۇشىن تەر توگەمىن. جالپى, وسى Grand Slam تۋرنيرىنە دەيىن ەكى جىل بويى مەدال العان جوقپىن. سپورتشى ءۇشىن بۇل وڭاي ەمەس. تالاي جارىستان قۇر قول قايتىپ, جانكۇيەرلەردى دە اشۋلاندىرىپ الدىم. بىراق ماعان سەنىمىن جوعالتپاعان باپكەرلەرگە راحمەت. ولار مەن ۇتىلعان سايىن قاتەمەن جۇمىس ىستەۋدى ۇدەتە ءتۇستى. «قانشا ۋاقىتىڭدى جاتتىعۋعا سارپ ەتتىڭ, ەندى وڭ ناتيجە بولۋى ءتيىس» دەپ جىگەرلەندىردى. ەندىگى ماقساتىم – وسى بابىمنان تايماي, جەڭىستى جولعى جالعاستىرۋ», - دەيدى جانساي سماعۇلوۆ.