بۇگىندە وبلىس اكىمى, ورىنباسارلارى اۋداندارعا بارىپ, جەرگىلىكتى تۇرعىنداردى جەكە ماسەلەلەرىمەن قابىلداۋدا. مىسالى, تۇركىستان وبلىسىنىڭ اكىمى ومىرزاق شوكەەۆ وبلىس ورتالىعىنان شالعاي اۋماقتا ورنالاسقان اۋدان تۇرعىندارىمەن جۇزدەسۋ ءۇشىن شىمكەنت قالاسىنا ارنايى باردى. تۇرعىنداردىڭ مۇڭ-مۇقتاجىن تىڭداپ, زاڭ اياسىندا جاۋاپ بەردى. كەي ماسەلە بويىنشا تىعىرىقتان شىعۋ جولدارى مەن ءتارتىبىن ءتۇسىندىردى.
كوكەيتەستى ماسەلەسىن وبلىس اكىمىنىڭ الدىندا اقتارعان تۇرعىنداردىڭ ءبىرى - تولەبيلىك ۇرزيا سەرگەباەۆا باسپانا تاۋقىمەتىن تارتىپ كەلەدى ەكەن. جالدامالى پاتەردى پانالاپ جۇرگەن بەس بالانىڭ اناسى تۇراقتى باسپاناعا مۇقتاج. 1,5 ملن تەڭگە كولەمىندە اتاۋلى الەۋمەتتىك كومەك العان انا, اعىلشىن جانە اراب تىلدەرىنەن اقىلى ساباق بەرۋمەن اينالىسادى ەكەن. كوپبالالى انانىڭ ءوتىنىشىن تىڭداعان وبلىس باسشىسى اۋدان اكىمدىگىنە ءتيىستى تاپسىرما بەردى. باسپانا تاۋقىمەتىن تارتقان تاعى ءبىر كوپبالالى انا – جازيرا تۇرعىنوۆا. جەتى بالانىڭ اناسىنا اكىمدىك دەمەۋشىلەردىڭ كومەگىمەن لەنگىر قالاسىنان 8,5 ملن تەڭگەگە 5 بولمەلى, تولىق جيعاز-جابدىقتارمەن قامتىلعان جەكە ءۇي ساتىپ الىپ بەرگەن. وتاعاسىنا بىرنەشە جەردەن جۇمىس تا ۇسىنىلىپتى. دەگەنمەن كوپبالالى انا ءۇيىنىڭ قازىر اپاتتى جاعدايدا ەكەنىن ايتىپ شاعىمداندى. ومىرزاق ەستاي ۇلى وتباسىنىڭ تۇرمىسىن ارنايى كوميسسيا تەكسەرىپ, قاجەت بولسا دەمەۋشىلەر ەسەبىنەن «قامقورلىق» جوباسى اياسىندا كومەك كورسەتىلەتىنىن ايتتى. ال ماقتاارال اۋدانى, مىرزاتوبە ەلدى مەكەنىنەن كەلگەن وڭلاسىن نازاروۆ بالاباقشا اشىپ, سپورت كەشەنىن سالۋدى جانە ەلدى مەكەندى تابيعي گازبەن قامتۋ ءوتىنىشىن جەتكىزدى. بۇل ورايدا وبلىس اكىمى اۋدان اكىمدىگىنە اۋىلداعى «ماحامبەت وتەمىس ۇلى» اتىنداعى №28 جالپى ورتا مەكتەبىنىڭ ەسكى عيماراتىن كۇردەلى جوندەۋدەن وتكىزىپ, بالاباقشا اشۋدى, جەرگىلىكتى بيۋدجەت ەسەبىنەن سپورتتىق الاڭشا سالۋدى جانە اۋىلدى كوگىلدىر وتىنمەن قامتۋدى قولعا الۋدى تاپسىردى.
قابىلداۋعا كەلگەندەر اراسىندا بەلگىلى ءبىر ماسەلەگە بايلانىستى ۇسىنىس-جوبالارىن جەتكىزگەندەر دە بولدى. مىسالى, ەرماحان كۋسكەەۆ ياساۋي مەن ارىستان باب كەسەنەلەرى ارالىعىنداعى اتىراپقا تۇركى ەلدەرىندەگى ەڭ وزىق مادەني مۇرالاردىڭ جيىنتىعىن جاساقتاۋ جوسپارىمەن تانىستىردى. جالپى وبلىس اكىمىنىڭ جەكە قابىلداۋىنا كەلگەن تۇرعىندار كوتەرگەن ماسەلەلەر باقىلاۋعا الىنىپ, ولاردى شەشۋ اۋدان اكىمدەرى مەن ءتيىستى باسقارما باسشىلارىنا جۇكتەلدى.