تۇركىستان وبلىسىندا اۆتوموبيل جولدارى مەن ەلدى مەكەن كوشەلەرىنىڭ جالپى ۇزىندىعى - 20 928,9 شاقىرىم. جەرگىلىكتى ماڭىزى بار اۆتوموبيل جولدارىنىڭ جاقسى جانە قاناعاتتانارلىق جاعدايداعى ۇلەسى وتكەن جىلى 74,1 پايىزعا جەتكەن. اتالعان كورسەتكىشتى بيىل 77,6 پايىزعا جەتكىزۋ كوزدەلۋدە.
جولاۋشىلار كولىگى جانە اۆتوموبيل جولدارى باسقارماسىنىڭ باسشىسى رولان يبراگيموۆتىڭمالىمدەۋىنشە, اۆتوموبيل جولدارىنا جۇرگىزىلگەن قۇرىلىس-جوندەۋ جۇمىستارىنىڭ اۋقىمى بويىنشا تۇركىستان وبلىسى رەسپۋبليكادا كوش باستاپ تۇر. سونداي-اق باسقارما باسشىسى, وڭىرلىك كوممۋنيكاتسيالار قىزمەتىندە, وتكەن جىلى 1 738 شاقىرىم جول مەن كوشە قۇرىلىس-جوندەۋ جۇمىستارىمەن قامتىلىپ, ونىڭ 1 270,4 شاقىرىمى پايدالانۋعا بەرىلگەنىن اتاپ ءوتتى. ال 2020 جىلى 869,8 شاقىرىم جول مەن كوشەلەرگە قۇرىلىس-جوندەۋ جۇمىستارى جۇرگىزىلمەك. وڭىردە جولاۋشىلارعا 44 تاسىمالداۋشى مەكەمەنىڭ 1300 قوعامدىق كولىگى قىزمەت كورسەتۋدە. وتكەن جىلى 8 ەلدى مەكەن قوعامدىق كولىكپەن قامتىلىپ, 19 تۇراقتى باعىت اشىلعان. وبلىس بويىنشا 238 قوعامدىق كولىك جاڭارتىلعان. سونىڭ ىشىندە, تۇركىستان قالاسى بويىنشا جەرگىلىكتى تاسىمالداۋشىمەن 26 جاڭا اۆتوبۋس ساتىپ الىنىپتى.