ەلىمىزدە بۇگىنگى تاڭدا اۆتوموبيل جاساۋ جالپى ماشينا جاساۋ سالاسى ىشىندە ەڭ جوعارى ءوسىم كورسەتىپ وتىر. وتكەن 2019 جىلى رەسپۋبليكا بويىنشا 359,5 ملرد تەڭگەگە 50 مىڭنان استام كولىك قۇرالى شىعارىلدى. ءوندىرىس ءوسىمى 62,5% قۇرادى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.
ناقتى وندىرۋشىلەرگە كەلسەك, 2019 جىلى «ازيا اۆتو» زاۋىتىندا 20 مىڭ اۆتوكولىك, «سارىارقااۆتوونەركاسىپ» كاسىپورنىندا 25802 (جەڭىل, جۇك اۆتوكولىكتەرى, اۆتوبۋستار مەن ارناۋلى تەحنيكا), «Hyundai Trans Auto» جشس-دە 496 (اۆتوبۋستار, جۇك تەحنيكاسى), «كاماز-ينجينيرينگ» جشس زاۋىتىندا 994 دانا كولىك قۇرالى, «Daewoo Bus Kazakhstan» زاۋىتىندا 496 (اۆتوبۋستار, گازەل «Next») جانە «سەماز» كاسىپورنىندا 1851 تەحنيكالىق قۇرال (جۇك كولىگى, اۆتوبۋستار, گازەل) شىعارىلدى.
قازاقستاندا اۆتوكولىك قۇرالدارىنىڭ بارلىق ساناتى شىعارىلاتىنىن ايتا كەتۋ كەرەك. ەلىمىزدە جالپى 167 مودەل قۇراستىرىلادى, ونىڭ ىشىندە 33 جەڭىل اۆتوكولىك. Nissan, Peugeot, Kia, Skoda, Hyundai, Renault, GM, IVECO, Daewoo, Ravon, JAC, SangYong سياقتى الەمگە ايگىلى برەندتەرمەن ىنتىماقتاستىق ورناتىلدى.
وتاندىق اۆتووندىرۋشىلەردى قولداۋ ماقساتىندا وتكەن جىلى كوممەرتسيالىق تەحنيكاعا ۋتيليزاتسيالىق جيىن مولشەرى ارتتىرىلدى. وعان قوسا, ۇلتتىق بانكتىڭ جەڭىلدەتىلگەن اۆتونەسيە باعدارلاماسى ىسكە قوسىلدى. ول بويىنشا 5 جىلدىڭ ىشىندە 100 ملرد تەڭگە (جىلىنا 20 ملرد تەڭگەدەن) بولىنەدى. 2019 جىلدىڭ قازان ايىنداالعاشقى ترانش ءبولىندى. ناتيجەسىندە قاراجاتتى رەۆولۆەرلىك مەڭگەرۋ ءادىسىن ەسەپتەگەندە 101,5 ملرد تەڭگەگە 19946 دانا كولىك قۇرالى ساتىلدى.
بۇل باعدارلاما تۇرعىندار اراسىندا ۇلكەن سۇرانىسقا يە ەكەنىن ايتا كەتۋ كەرەك. رەسپۋبليكا بويىنشا ورتا ەسەپپەن العاندا اۆتوكولىككە دەگەن قاجەتتىلىك 65 مىڭ دانانى قۇرايدى.