مەملەكەتتىك قىزمەت ىستەرى اگەنتتىگىنىڭ قىزىلوردا وبلىسىنداعى ادەپ جونىندەگى كەڭەسى وتىرىس وتكىزدى.
جىل باسىنداعى جيىندا مەملەكەتتىك قىزمەت جانە سىبايلاس جەمقورلىققا قارسى ءىس-قيمىل تۋرالى زاڭنامالاردىڭ ساقتالۋى, ادەپ كودەكسىنە كەرەعار كەلەتىن جايلاردى بولدىرماۋ باعىتىنداعى شارالار جونىندە وبلىستىق ءبىلىم سالاسىنداعى باقىلاۋ دەپارتامەنتىنىڭ باسشىسى عاليا داۋلەتوۆا مەن جەردىڭ پايدالانىلۋى مەن قورعالۋىن باقىلاۋ باسقارماسىنىڭ جەتەكشىسى قايرات توعىزباەۆ ەسەپ بەردى. وبلىس اكىمى اپپاراتىنىڭ ادەپ جونىندەگى ۋاكىلى حاميت تارباقوۆتىڭ حابارلاماسىنان كەيىن كەڭەس توراعاسى نۇرمان تالقانباەۆ مەملەكەتتىڭ قىزمەتشىلەردىڭ ەتەكباستى ەسكى ادەتتەن ءالى دە ارىلا الماي كەلە جاتقانىن باسا ايتتى.
وتىرىستا وبلىستىق اكىمدىك تاراپىنان قىزمەتتىك كولىكتەر قوزعالىسىنا مونيتورينگ جاسالمايتىنى ءسوز بولدى. قىزمەتتىك كولىكتەر جۇمىستان تىس ۋاقىتتا, ءتىپتى دەمالىس كۇندەرى دە كوشەدە جۇيتكىپ جۇرەدى. قازىر ەكىنىڭ ءبىرى كەز كەلگەن ماسەلەنى الەۋمەتتىك جەلىگە جۇكتەيتىنى بەلگىلى عوي. مىسالى, مەملەكەتتىك قىزمەت ىستەرى اگەنتتىگىنىڭ قىزىلوردا وبلىسى بويىنشا دەپارتامەنتى جەرگىلىكتى تۇرعىننىڭ 2019 جىلدىڭ 30 جەلتوقسانىندا فەيسبۋك جەلىسىنە سالعان وسىنداي جازباسىنا دايەكتى پىكىر-جاۋاپ ءبىلدىرۋ جونىندە وبلىس اكىمى اپپاراتىنا ۇسىنىس جولداعان. بىراق, اراعا اي وتسە دە اكىم اپپاراتى ءالى ءۇنسىز وتىر.
وسىعان دەيىن مەملەكەتتىك قىزمەتكەرلەردىڭ جۇمىس ۋاقىتىن رەتتەۋ تۋرالى ءبىرشاما جاقسى باستاما قولعا الىنعانى بەلگىلى. بىراق سولاردىڭ ءوزى جەتكىلىكتى دارەجەدە جۇزەگە اسپاي جاتىر. وسىعان بايلانىستى ادەپ جونىندەگى ۋاكىلگە ءتۇرلى ۇسىنىس ايتىلدى.
وبلىس اكىمدىگىنىڭ ءىس باسقارماسىنىڭ مالىمەتتەرىندە وتكەن جىلعى جەلتوقسان, بيىلعى قاڭتار ايلارىندا باسقارمالار تاراپىنان قىزمەتتىك اۆتوكولىكتەردى سەنبى-جەكسەنبى, مەرەكە كۇندەرى قىزمەتتىك قاجەتتىلىككە بايلانىستى جۇمىسقا شىعارۋ تۋرالى 142 ءوتىنىم تۇسكەندىگى كورسەتىلگەن. بۇل مەملەكەتتىك قىزمەتكەرلەردىڭ دەمالىس كۇندەرى ارتىق جۇمىس ىستەيتىندىگىنىڭ دالەلى. مۇنداي جاعدايدا قىزمەتكەرلەرگە تيىسىنشە جالاقىسى تولەنۋى ءتيىس. سونداي-اق, باسقارمالاردىڭ باس-باسىنا اۆتوكولىك بولمەي, بارلىعى پايدالاناتىن كەزەكشى ءبىر-ەكى كولىك بەكىتۋدى ۇسىنامىن. وسى جۇمىستاردى ادەپ جونىندەگى ۋاكىل رەتىندە باقىلاۋىڭىزعا الۋىڭىزدى سۇرايمىن, - دەدى كەڭەس توراعاسى ن. تالقانباەۆ.
سونىمەن بىرگە, وبلىستىق باسقارمالاردىڭ باسىم كوپشىلىگىندە مەملەكەتتىك قىزمەتشىلەردىڭ جۇمىسقا كىرىپ-شىعۋىن باقىلايتىن جۇيە ورناتىلعان. بىراق, وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار جانە ەڭبەك سالاسىنداعى باقىلاۋ باسقارمالارىندا ورناتىلعان وسىنداي جۇيە ىسكە قوسىلماي تۇر. جۇرگىزىلگەن مونيتورينگ وتكەن جىلدىڭ قاراشا ايىندا جەرگىلىكتى اتقارۋشى ورگاندار قىزمەتكەرلەرى 38 ساعات ارتىق جۇمىس ىستەگەنىن كورسەتكەن. ال جەلتوقسان ايىندا ول 46 ساعاتقا جەتكەن.
كەڭەس قورىتىندىسىندا وبلىس اكىمى اپپاراتىنا تالقىلانعان ماسەلەلەردى رەتتەۋ, زاڭسىز سىيلىق الۋ, قوعامدىق ورىنداردا مورالدىق-ەتيكالىق نورمالاردى بۇزۋ سەكىلدى فاكتىلەردى بولدىرماۋ, جەرگىلىكتى اتقارۋشى ورگاندار قىزمەتكەرلەرىنە قاتىستى الەۋمەتتىك جەلىلەردە جاريالانعان جاعىمسىز سيپاتتاعى جاريالانىمدارعا مونيتورينگ جۇرگىزىپ, دەر كەزىندە ءتيىستى شارالار قابىلداۋ ۇسىنىلدى.