رەداكتسيامىزعا جاس عالىمدار حابارلاسىپ, الداعى جۇمىستارىن جوسپارلاۋ ءۇشىن بىلتىر جاريالانعان جاس عالىمداردىڭ جوبالارىنا ارنالعان بايقاۋ ناتيجەسىن اسىعا كۇتىپ, 2019 جىلدىڭ اياعىندا شىعۋى ءتيىس قورىتىندىنىڭ كەشىگۋ سەبەبىن بىلە الماي جۇرگەنىن جەتكىزدى. وسى ماسەلە بويىنشا ءتيىستى ۆەدومستۆوعا حابارلاستىق.
ءبىلىم جانە عىلىم مينيسترلىگىنىڭ بىزگە بەرگەن اقپاراتتارىنا قاراعاندا, بايقاۋ قورىتىندىسى الداعى اقپان ايىندا بەلگىلى بولماق. ۆەدومستۆو ناتيجەنىڭ كەشىگۋ سەبەبىن جۇمىستاردىڭ ۇلتتىق عىلىمي كەڭەستە ءجىتى قارالىپ جاتقانىمەن ءتۇسىندىردى. ويتكەنى ۇلتتىق مەملەكەتتىك عىلىمي-تەحنيكالىق ساراپتاما ورتالىعى بايقاۋ تالابىنداعى شەكتى بالدى جيناعان وتىنىمدەردى ىرىكتەپ, 2019 جىلدىڭ 30 جەلتوقسانىندا ۇلتتىق عىلىمي كەڭەستىڭ قاراۋىنا جولداعان. عىلىم كوميتەتىنىڭ دەرەگى بويىشا, 27 شىلدە مەن 22 تامىز ارالىعىندا 1376 ءوتىنىم كەلىپ تۇسكەن. جوبالىق جۇمىستاردىڭ 264-ءى شەكتى بالل جيناي الماعاندىقتان كەرى قايتارىلعان.
عالىمداردىڭ الاڭداۋشىلىعىن دا تۇسىنۋگە بولادى, سەبەبى ولاردىڭ جۇمىسى عانا ەمەس, كۇندەلىكتى كۇنكورىسى دە وسىنداي گرانتتىق جوبالارعا بولىنەتىن قارجىلىق قولداۋلارعا تاۋەلدى.
ەستەرىڭىزگە سالا كەتەيىك, ەلباسىنىڭ باستاماسىمەن جاستار جىلىندا جاس عالىمداردىڭ جوبالارىنا 3 ملرد تەڭگە بولىنگەن ەدى. سونىڭ نەگىزىندە جاس عالىمدار اراسىندا گرانتتىق بايقاۋ جاريالاندى. بۇل 2020-2022 جىلدارعا ارنالعان عىلىمي نەمەسە عىلىمي-تەحنيكالىق جوبالار بويىنشا جاس عالىمداردى گرانتتىق قارجىلاندىرۋعا باعىتتالعان. عىلىم كوميتەتى وتكىزىپ وتىرعان بايقاۋدا گۋمانيتارلىق عىلىمدار سالاسىنداعى ىرگەلى جانە قولدانبالى زەرتتەۋلەر; ەنەرگەتيكا جانە ماشينا جاساۋ; تابيعي, ونىڭ ىشىندە سۋ رەسۋرستارىن ءتيىمدى پايدالانۋ, گەولوگيا, قايتا وڭدەۋ, جاڭا ماتەريالدار مەن تەحنولوگيالار, قاۋىپسىز بۇيىمدار مەن قۇرىلىمدار; ءومىر جانە دەنساۋلىق تۋرالى عىلىمدار; اقپاراتتىق, تەلەكوممۋنيكاتسيالىق جانە عارىشتىق تەحنولوگيالار, جاراتىلىستانۋ عىلىمدارى سالاسىنداعى عىلىمي-زەرتتەۋلەر; اگروونەركاسىپ كەشەنىنىڭ تۇراقتى دامۋى جانە اۋىلشارۋاشىلىق ءونىمىنىڭ قاۋىپسىزدىگى; ۇلتتىق قاۋىپسىزدىك جانە قورعانىس باعىتتارى بويىنشا جوبالار قارالىپ جاتىر. تاعى ءبىر اۋىز تولتىرىپ ايتاتىنى, ءوتىنىم وسى بايقاۋدا بۇرىنعىداي قاعاز تۇرىندە ەمەس, ونلاين تارتىبىمەن بەرىلدى. ياعني, جوبا جەتەكشىسى جانە ءوتىنىم بەرۋشىنىڭ ەلەكتروندى تسيفرلى قولىمەن راستالعان كونكۋرستىق وتىنىمدەر عىلىم كوميتەتىنە ەلەكتروندى تۇردە «ۇلتتىق مەملەكەتتىك عىلىمي-تەحنيكالىق ساراپتاما ورتالىعى» اكتسيونەرلىك قوعامىنىڭ اقپاراتتىق جۇيەسى ارقىلى جۇرگىزىلدى. ال ءوتىنىم قابىلداۋ 2019 جىلدىڭ 12 تامىزىندا توقتاتىلعان ەدى.