قاسيەتتى رامازان ايى باستالعاندا «ازىرەت سۇلتان» مەشىتىنىڭ ۇجىمى الەۋمەتتىك جاعدايى تومەن, كوپ بالالى وتباسىلاردىڭ بالالارىن مەكتەپكە دايىنداۋ اكتسياسىن جاريالاپ, قايىرىمدى جانداردى وسىناۋ شاراعا ۇلەس قوسۋعا شاقىرعان بولاتىن. مىنە, سول يگى شارا قادىر ءتۇنى قارساڭىندا – 3 تامىزدا ءوتتى.
قاسيەتتى رامازان ايى باستالعاندا «ازىرەت سۇلتان» مەشىتىنىڭ ۇجىمى الەۋمەتتىك جاعدايى تومەن, كوپ بالالى وتباسىلاردىڭ بالالارىن مەكتەپكە دايىنداۋ اكتسياسىن جاريالاپ, قايىرىمدى جانداردى وسىناۋ شاراعا ۇلەس قوسۋعا شاقىرعان بولاتىن. مىنە, سول يگى شارا قادىر ءتۇنى قارساڭىندا – 3 تامىزدا ءوتتى.ۇيىمداستىرۋشىلاردىڭ ايتۋىنشا, ءار بالاعا كيىم-كەشەك, سپورتتىق فورما, سومكە, قالام, داپتەر سياقتى وقۋ قۇرال-جابدىقتارىن ساتىپ الۋعا شامامەن 30 مىڭ تەڭگە جۇمسالعان. كيىم-كەشەكتەر بالالاردىڭ جاس مولشەرىنە قاراي ۇلەستىرىلدى. ءسويتىپ, وسىناۋ يگى شارادان سوڭ الەۋمەتتىك جاعىنان از قامتىلعان جانە كوپ بالالى وتباسىلاردان شىققان 300-دەن استام بالا جاڭا وقۋ جىلىنا تاپ-تۇيناقتاي دايىن بولدى.
– بۇل شارا ەلىمىزگە, دىنىمىزگە جاناشىر ازاماتتاردىڭ قولداۋىمەن جۇزەگە اسىپ وتىر, – دەدى «ازىرەت سۇلتان» مەشىتىنىڭ باس يمامى قايرات جولدىباي ۇلى. – ءتىپتى, كەيبىر دۇكەن يەلەرى اكتسياعا ءوز ۇلەستەرىن قوسۋ ءۇشىن تاۋارلارىن ادەتتەگىدەن تومەن باعامەن بەردى. وسى باستاماعا اتسالىسقانداردىڭ بارلىعىنا اللا رازى بولسىن!
قازىرگى زاماندا بالالاردى مەكتەپكە دايىنداۋدىڭ كوپ شىعىنعا تۇسەتىنى بەلگىلى. ال تۇرمىسى تومەن جانە كوپ بالالى وتباسىلار ءۇشىن بۇل, ءتىپتى, كۇرمەۋى قيىن ءىس دەسەك تە بولادى. ماسەلەن, 8 بالا ءوسىرىپ وتىرعان 36 جاستاعى مارجان اليقىزىنىڭ (سۋرەتتە) 6 بالاسى مەكتەپ جاسىندا. باسپاناسى جوق وتباسى ءۇشىن 6 بالانى بىردەي مەكتەپكە دايىنداۋ وڭاي ما؟! وسى شارانىڭ ارقاسىندا بۇل ماسەلەنىڭ ءتۇيىنىن شەشىپ قايتقان مارجان اپاي بىلاي دەدى:
– 2009 جىلى جامبىل وبلىسى, بايزاق اۋدانى, جەتىباي اۋىلىنان 6 بالامىزبەن كوشىپ كەلدىك. قىزدارىم ءبيبىنۇر مەن ايشا استانادا دۇنيەگە كەلدى. جولداسىم قۇبىر زاۋىتىندا جۇمىس ىستەيدى. شىنى كەرەك, تاپقانى ءبىر ايلىق پاتەراقى مەن ءىشىپ-جەمنەن ارتىلمايدى. اكتسيا تۋرالى ەستىپ, ءوتىنىش بىلدىردىك. كوپ كەشىكپەي مەشىت قىزمەتكەرلەرى حابارلاسىپ, جاڭا وقۋ جىلىنا كەرەك-جاراقتارىمىزدى تۇگەندەۋگە كومەكتەسەتىندەرىن ايتتى. قۋانىپ وتىرمىز. قايىرىمدى ءىس-شاراعا اتسالىسقان ازاماتتارعا اللانىڭ نۇرى جاۋسىن, جومارت جاندار كوبەيە بەرسىن دەگىم كەلەدى.
اكتسيا اياسىندا تەگىن كيىم-كەشەك, وقۋ قۇرال-جابدىقتارى تەك قازاق بالالارىنا عانا ەمەس, وزگە دە ۇلت وكىلدەرىنىڭ بالالارىنا ۇلەستىرىلدى. قازاقستان مۇسىلماندارى ءدىني باسقارماسىنىڭ ۇيىتقى بولۋىمەن مۇنداي شارا وزگە مەشىتتەردە دە جىل سايىن وتكىزىلىپ تۇرماق.
الماس ماناپ,
«ەگەمەن قازاقستان».
استانا.
سۋرەتتى تۇسىرگەن اۆتور.