قازاقستان قارۋلى كۇشتەرى اۋە قورعانىسى كۇشتەرىنىڭ باس قولباسشىسى, اۆياتسيا گەنەرال-مايورى نۇرلان ورمانبەتوۆ الماتى, شىمكەنت, اقتاۋ گارنيزوندارىنداعى اۆياتسيا اسكەري بولىمدەرىنىڭ جاۋىنگەرلىك ازىرلىگىنە جوسپارلى تەكسەرۋ جۇرگىزدى.
تەكسەرۋ بارىسىندا جەتىگەن گارنيزونىندا اسكەري ءبولىم كومانديرلەرىمەن جويعىش بومبالاۋشى ميگ-27 جانە كوپ ماقساتتى جويعىش سۋ-27 سياقتى ءۇشىنشى جانە ءتورتىنشى بۋىننىڭ كوپ فۋنكتسيالى ۇشاقتارىندا ماقساتتى ۇشۋلار ورىندالدى. وسى ۇشۋلار ارقىلى ۇشقىشتار جوعارى تۇرعان قولباسشىلىق الدىندا ۇشۋ تەحنيكاسى مەن اۋە ناۆيگاتسياسىنداعى شەبەرلىكتەرىن كورسەتتى.
– ءبىزدىڭ ۇشقىشتار ۇشۋ داعدىسىن, جاۋىنگەرلىك ازىرلىگىن ارتتىرىپ, ولارعا جۇكتەلگەن وتانىمىزدىڭ اۋە كەڭىستىگىن كۇزەتۋ جانە قورعاۋ جونىندەگى كەز كەلگەن جاۋىنگەرلىك مىندەتتى ورىنداۋعا دايىن بولۋى ءتيىس, – دەدى اۋە قورعانىسى كۇشتەرىنىڭ باس قولباسشىسى نۇرلان ورمانبەتوۆ. – اۆياتسيا – بەيبىت كۇندەرى جاۋىنگەرلىك كەزەكشىلىك اتقاراتىن وتە كۇردەلى اسكەر تەگى. ونىڭ مۇمكىندىكتەرى وتە اۋقىمدى. ءبىز اۋە قورعانىسى كۇشتەرى دايارلىعىنىڭ بىرىڭعاي ادىستەمەسىن باسشىلىققا الىپ, قويىلعان مىندەتتى ورىنداۋعا سانالى تۇردە قاراۋدى ءاربىر اسكەري قىزمەتشىدەن قاتاڭ تالاپ ەتۋىمىز كەرەك. جاۋىنگەرلىك ماشىقتانۋ جانە ۇشۋ دايارلىعى جۇيەلەرىن جەتىلدىرە ءتۇسۋىمىز قاجەت.
بۇگىنگى تاڭدا جاۋىنگەرلىك كەزەكشىلىكتى ساپالى اتقارۋعا, جاۋىنگەرلىك دايارلىق بويىنشا ساباقتار وتكىزۋگە, اۆياتسيالىق بولىمدەر جەكە قۇرامىنىڭ تۇرمىس-تىرشىلىگى ءۇشىن بارلىق جاعدايلار جاسالعان.
«ەگەمەن-اقپارات».