«قازاقستان – دوستىق بەسىگى» اتتى جازعى حالىقارالىق لاگەرىندە اقتوبە جانە رەسەيدىڭ ورىنبور وڭىرلەرىنىڭ جاستارى باس قوستى. ءۇش كۇندىك جيىن كەزىندە جاستار ءتۇرلى سەمينارلارعا قاتىسىپ, پسيحولوگ ماماندارمەن كەزدەسۋلەر وتكىزدى, ءوزارا ويىندار, كونكۋرستار ۇيىمداستىرىلدى.
شارانىڭ ۇيىمداستىرۋشىلارى بولىپ تابىلاتىن «جاستار قازىنا» قوعامدىق بىرلەستىگىنىڭ وكىلدەرى جاستارعا ءوزارا پىكىر الماسىپ قانا قويماي, دەم الىپ, ءوز ونەرلەرىن ورتاعا سالۋعا مۇمكىندىك بەرۋدى ويلاستىرعان. اقتوبەدە مۇنداي حالىقارالىق لاگەر بيىل سەگىزىنشى رەت ۇيىمداستىرىلىپ وتىرعان كورىنەدى.
– اقتوبەلىك جاستارمەن دوستىق قارىم-قاتىناس ورناتقانىمىزعا ءبىراز ۋاقىت بولدى. وسىنداي لاگەرلەر ەكى جاقتى ۇيىمداستىرىلىپ كەلەدى, – دەيدى رەسەي جاستار وداعى ورىنبور قالالىق ۇيىمىنىڭ توراعاسى رۋسلان چۋكەەۆ.
«قازاقستان – دوستىق بەسىگى» حالىقارالىق لاگەرىندە باس قوسقان ەكى ەل جاستارى اقتوبە قالاسىنىڭ اكىمى ەرحان وماروۆپەن دە كەزدەستى.
شاھار باسشىسى جاستارعا يگى تىلەكتەرىن جەتكىزە وتىرىپ, بولاشاقتا مۇنداي لاگەرلەرگە تەك رەسەي ەمەس, باسقا ەلدەردەن دە قوناقتار شاقىرۋ جوسپارلانىپ وتىرعانىن جەتكىزدى. ول كەزدەسۋدە جاستاردىڭ ءتۇرلى ساۋالدارىنا جاۋاپ بەرۋگە دە ۋاقىت تاپتى. شەكارالاس ەكى ءوڭىر جاستارىنىڭ باسقوسۋى دوستىقتىڭ ارقاۋىن بەكىتەتىن شارا رەتىندە ەستە قالارى ءسوزسىز.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.