جانىبەك اۋدانىندا ەت ءوندىرۋ ارتتى

جانىبەك اۋدانىندا بىلتىر جاڭادان 20 شارۋا قوجالى­عى قۇرىلىپ, ولاردىڭ جالپى سانى 365-كە جەتكەن. اۋدان اكىمى ازامات سافيماليەۆتىڭ ايتۋىنشا, الدىڭعى جىلمەن سالىستىرعاندا وڭىردە ءىرى قارا مەن جىلقى باسى كوبەيگەن. سونىمەن قاتار شارۋالار ساننان ساپاعا كوشۋگە كىرىسىپتى. ماسەلەن, بىلتىر جىل باسىنان 111 شارۋا قوجالىعى 349 باس اسىل تۇقىمدى بۇقا, 7 شارۋا قوجالىعى 150 باس اسىل تۇقىمدى قوشقار ساتىپ الىپتى. قوعامدىق مال, ياعني تۇرعىنداردىڭ جەكە يەلىكتەرىندەگى سيىر تابىندارىنا دا 119 باس اسىل تۇقىمدى بۇقا قوسىلىپ, اۋداندا مال تۇقىمىن جاقسارتۋ ءۇشىن جۇيەلى جۇمىس ءجۇرىپ جاتىر ەكەن.

– بىلتىر ەكسپورتقا 130 توننا ءىرى قارا ەتىن, 45 توننا قوي ەتىن شىعارۋ جوسپارلانعان بولاتىن. بۇگىندە ارمەنيا رەسپۋبليكاسىنا 999,46 توننا ءىرى قارا ەتى (7139 باس) شىعارىلىپ, جوسپار 768%-عا ورىندالسا, رەسەي فەدەراتسياسىنا 79,76 توننا قوي ەتى (3988 باس) ەكسپورتتالىپ, جوسپار 177%-دى قۇرادى, – دەيدى ازامات سافيماليەۆ.

شارۋالارعا كۇز جايلى ءتيدى. سول ارقىلى مال قىستاعىنا دايىن­دىق ويداعىداي بولدى. كۇنى بۇگىن اۋىلدىق وكرۋگتەردە 214,10 مىڭ گا شابىندىق جەردەن 104,91 مىڭ توننا ءشوپ جينالىپ الىنعان. اۋدان بويىنشا جاڭادان 31 اۋىلشارۋاشىلىق تەحنيكاسى الىنىپ, تەحنيكالىق بازا 22 پايىزعا جاڭارتىلعان.

– اۋدان شارۋاشىلىقتارىنىڭ دامۋىنا مەملەكەت تاراپىنان كورسەتىلىپ وتىرعان جۇيەلى قولداۋ دا پايداسىن بەرىپ جاتىر. جىل باسىنان 27 شارۋا قوجالىعى 72 ملن 900 مىڭ تەڭگەگە 27 بىرلىك كۇن باتارەياسىن قوندىرىپ, 58 ملن 320 مىڭ تەڭگە سۋبسيديا الدى. 29 شارۋا قوجالىعى 62 ملن تەڭگەگە 31 قۇدىق قازىپ, 49 ملن 600 مىڭ تەڭگە كولەمىندە سۋبسيدياعا يە بولدى. سونىمەن قاتار 48 شارۋا قوجالىعى 28 ملن 800 مىڭ تەڭگەگە تۇراقتى توك تارتاتىن 48 اگرەگات (گەنەراتور) ساتىپ السا, ول قارجىنىڭ 28 ملن 800 مىڭ تەڭگەسى سۋبسيديا تۇرىندە كەرى تولەندى, – دەيدى اۋدان باسشىسى.

بۇدان بولەك «ناتيجەلى جۇ­مىس­پەن قامتۋ» باعدارلاماسى بو­يىن­شا جانىبەك اۋدانىنا 200 ملن نەسيە قاراجاتى بولىنگەن ەكەن.

باتىس قازاقستان وبلىسى