25 ناۋرىزدا تاتارستاننىڭ جاڭا پرەزيدەنتى رۇستەم ميننيحانوۆتىڭ يناۋگۋراتسياسى ءوتتى.
وسى تاريحي وقيعاعا وراي شاقىرىلعان جوعارى مارتەبەلى قوناقتار اراسىندا قازاقستان رەسپۋبليكاسى ءبىلىم جانە عىلىم ءمينيسترى جانسەيىت تۇيمەباەۆ باستاعان قازاقستاندىق دەلەگاتسيا دا بولدى. قۇتتىقتاۋ ءسوز سويلەگەن مينيستر قازاقستان مەن تاتارستاندى تۇركى تىلدەس باۋىرلاس ەلدەرگە ءتان مادەني قاتىناستار عانا ەمەس, سونىمەن بىرگە ورتاق تاعدىر, ورتاق مۇددە مەن ماقسات بىرىكتىرەتىندىگىن اتاپ ءوتتى.
قازاقستان مەن رەسەيدىڭ ىنتىماقتاستىعىن سوڭعى جىلدارى ەكونوميكالىق دامۋ, حالىقتى الەۋمەتتىك قامتاماسىز ەتۋ كورسەتكىشتەرى بويىنشا قارقىندى دامىپ كەلە جاتقان سولتۇستىك كورشىلەس ەلدەگى ءىرى ايماق – تاتارستانسىز ەلەستەتۋ مۇمكىن ەمەس, – دەدى ج.تۇيمەباەۆ. – ءسىزدىڭ الدىڭىزدا ەلدىڭ كوشباسشىسى رەتىندە كوپتەگەن ماڭىزدى ماسەلەلەردى شەشۋ مىندەتى تۇر. ونىڭ بارلىعىن تاتارستان حالقى مۇددەسىنە ساي شەشەتىنىڭىزگە سەنىمدىمىن. جاۋاپتى جاڭا مەملەكەتتىك قىزمەتىڭىزدە تابىس تىلەيمىن.
سونىمەن قاتار جانسەيىت ءتۇيمەباەۆ تاتارستاننىڭ بۇرىنعى باسشىسى مينتەمير شايميەۆكە ەلىمىزدىڭ ءى-دارەجەلى “دوستىق” وردەنىن سالتاناتتى تۇردە تاپسىردى.
“ەگەمەن-اقپارات”.