كوكشەتاۋداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبى ساپالى ءبىلىم بەرەتىن وڭىردەگى كوشباسشى وقۋ ورداسى. مەكتەپ وقۋشىلارى روبوتوتەحنيكادان وتەتىن دۇنيەجۇزىلىك جارىستا قازاقستان قۇراماسى ساپىندا ەل نامىسىن لايىقتى دەڭگەيدە قورعاپ ءجۇر.
ال, جۋىردا 12-ءشى سىنىپ وقۋشىلارى راحات حاميتوۆ پەن جاركەن وتەگەنوۆ كورەي ەلىندە وتەتىن دۇنيەجۇزىلىك «جاس عالىمدار» بايقاۋىندا وزدەرىنىڭ جوبالارىن قورعاماق, ال, سوفيا كوكورينا مەن گەورگي شيلياەۆ قازاقستان قۇراماسى ساپىندا ەلدىڭ نامىسىن قورعاۋدا.
–مەن ءۇش جىل قاتارىنان الەمدىك وليمپياداعا قاتىسۋدامىن. روبوتوتەحنيكا وزىمەن قاتتى ۇنايدى. وليمپيادادا زاتتاردى تاسىمالدايتىن روبوت قۇراستىرۋ قاجەت بولدى. ءبىز بۇل تاپسىرمانى تاپ-تۇيناقتاي ەتىپ ورىنداپ شىقتىق, دەيدى نازارباەۆ زياتكەرلىك مەكتەبىنىڭ 6 سىنىپ وقۋشىسى سوفيا كوكورينا.
كوكشەتاۋلىق وقۋشىلار الەمدىك دەڭگەيدەگى روبوتوتەحنيكا جارىستارىنا وسىمەن ءۇشىنشى جىل قاتارىنان قاتىسۋدا. ناتيجەسىز ەمەس.
–2017 جىلى دۇنيەجۇزىلىك جارىس كوستا-ريكا ەلىندە ءوتتى. 81 كوماندانىڭ ىشىندە ءبىز 29-شى ورىنعا يە بولدىق. 2018 جىلى تايلاندتا وتكەن جارىسقا 63 مەملەكەتتەن 104 كوماندا قاتىستى. ءبىزدىڭ توپ 9-شى ورىننان كورىندى, ال بىلتىر ۆەنگريادا ءوتتى. ءبىزدىڭ بالالار 8-ءشى ورىنعا كوتەرىلدى. مەكتەبىمىزدە بالالاردىڭ روبوتوتەحنيكامەن اينالىسۋى ءۇشىن بارلىق جاعداي جاسالعان. وقۋشىلارىمىزدىڭ قىزىعۋشىلىقتارى دا زور, دەيدى نازارباەۆ زياتكەرلىك مەكتەبىنىڭ مۇعالىمى, روبوتوتەحنيكادان جاتتىقتىرۋشى قۋانىش قاناپوۆ.
كوكشەتاۋداعى فيزيكا-ماتەماتيكالىق باعىتتاعى نازارباەۆ زياتكەرلىك مەكتەبى بىلتىرعى جىلى حالىقارالىق مەكتەپتەر كەڭەسى اككرەديتاتسياسىنان ءساتتى ءوتتى. بۇل ءبىلىم ورداسىنىڭ بارلىق ستاندارتتار بويىنشا الەمدىك دەڭگەيدەگى ەڭ قاتاڭ كريتەريلەرگە ساي ەكەنىن دالەلدەپ وتىر. وقۋشىلاردىڭ عىلىمي جانە شىعارماشىلىق باعىتتاعى جەتىستىكتەرى دە مول. ماسەلەن, ەلىمىزدەگى نازارباەۆ زياتكەرلىك مەكتەپتەرى اراسىندا وتكەن عىلىمي بايقاۋلار جارىسىندا راحات حاميتوۆ پەن جاركەن وتەگەنوۆتىڭ جوبالارى ۇزدىك دەپ تانىلدى. ەندى ولار كورەي ەلىندە وتەتىن دۇنيەجۇزىلىك «جاس عالىمدار» بايقاۋىندا وزدەرىنىڭ جوبالارىن قورعاماق.
–بۇل ساۋدا ءۇيىنىڭ ماكەتى. مۇندا 2 كامەرا ورناتىلعان. ول ءاربىر بولمەدەگى ادامداردىڭ سانى مەن ورنالاسۋىن انىقتايدى. وسىعان قوسا پايتن كومپيۋتەرلىك ءتىلى ارقىلى «Open sivi» بيبليوتەكاسىن قولدانىپ, كامەرالار ارقىلى ورتكە قارسى جۇيەنى دايىندادىق. ياعني, مەن قازىر سىرەڭكەنى جاقىنداتىپ, ەدەندە بىردەن جارىق پايدا بولادى. ياعني, شىعاتىن باعىت كورسەتىلەدى, دەيدى نازارباەۆ زياتكەرلىك مەكتەبىنىڭ 12-سىنىپ وقۋشىسى راحات حاميتوۆ.
راحاتتىڭ ايتۋىنشا, رەسەيدىڭ كەمەروۆو قالاسىنداعى «زيمنيايا ۆيشنيا» ساۋدا ۇيىندە بولعان ءورت بۇل جوبانى ازىرلەۋگە تۇرتكى بولعان. سەبەبى, كينوتەاتردا ەسىكتەردىڭ جابىق بولۋى سالدارىنان قانشاما ادامدار قازا بولدى. سوندىقتان وقۋشىلار ازىرلەگەن جۇيە بويىنشا ءورت كەزىندە قوسىمشا ەسىكتەر اۆتوماتتى تۇردە اشىلادى جانە ادامدارعا ودان شىعۋ ءۇشىن ارنايى شامدارمەن باعىت كورسەتىلەدى. سونىمەن قاتار ءورت سوندىرۋشىلەر ارنايى باعدارلاما نەگىزىندە عيماراتتا قانشا ادام قالعانى جونىندە بىلە الادى.