بۇل كۇندە جۇرەك-قان تامىرلارى دەرتتەرىنەن بولاتىن اۋرۋ-سىرقاۋ مەن ءولىم-ءجىتىمنىڭ بەلەڭ الۋى ماماندارىمىزعا زاماناۋي تۇرعىدا تاجىريبە جيناقتاۋدى جۇكتەپ وتىر.
وسى ماسەلەگە وراي, الماتىداعى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا الماتى, تالدىقورعان, اتىراۋ, تاراز, پەتروپاۆل قالالارىنىڭ ينتەرۆەنتسيالىق كارديولوگتارى مەن ەلەكتروفيزيولوگتارى, اريتمولوگتارى, سونداي-اق وزبەكستاننىڭ ينتەرۆەنتسيالىق اريتمولوگتارى ءۇشىن كلينيكالىق ەلەكتروفيزيولوگيا جانە ينتەرۆەنتسيالىق اريتمولوگيا بويىنشا وقىتۋ تسيكلى ءوتتى.
شەبەرلىك كۋرسىن اۋستريانىڭ سانكت پيولتەن قالاسىنداعى University Heart Center پروفەسسورى, قوندىرعىلاردى يمپلانتتاۋ جانە ەلەكترودتاردى ەندوۆاسكۋليارلىق ەكستراكتسيالاۋ جونىندەگى جەتەكشى ساراپشى كريستيان ۆولمان جۇرگىزدى. سونداي-اق, دوكتور كريستيان ۆولمان تىڭداۋشىلارعا سينۋستىق ءتۇيىننىڭ السىرەۋ سيندرومى مەن ونى ەمدەۋدىڭ زاماناۋي تاسىلدەرى تۋرالى ايتىپ بەردى.
سونىمەن بىرگە جۇرەك ىرعاعى جانە وتكىزگىشتىگىنىڭ اۋىتقۋلارى بولىمشەسىنىڭ جەتەكشىسى, اريتمولوگ دارىگەر, جۇرەك ەلەكتروفيزيولوگى روين رەكۆاۆا كۋرسقا قاتىسقان دارىگەرلەردى جۇرەك ىرعاعىنىڭ بۇزىلىستارىن ەمدەۋدىڭ زاماناۋي ينتەرۆەنتسيالىق ادىستەرىمەن تانىستىردى. ول جۇرەكالدى فيبريللياتسيا بارلىق ينسۋلتتاردىڭ شامامەن ۇشتەن ءبىر بولىگىنىڭ جانە دەنەنىڭ باسقا جەرىندە پايدا بولاتىن ۇيىعان قاننىڭ جارىلىپ, قان اعىسى ارقىلى ميعا قۇيىلعان كەزىندە تۋىندايتىن ەمبوليالىق ءينسۋلتتىڭ نەگىزگى سەبەپشىسى بولىپ تابىلاتىنىن اتاپ ءوتتى.
وقىتۋ كۋرسى كەزىندە پروفەسسور كريستيان ۆولمان مەن روين رەكۆاۆا وتا جاساي وتىرىپ شەبەرلىك ساعاتىن وتكىزدى.
سونداي-اق, داعدارىستاردى زەرتتەۋ ورتالىعىنىڭ (كاۋناس, ليتۆا) كارديولوگ دارىگەرلەرى كۋرس تىڭداۋشىلارىن جۇرەكالدى فيبريللياتسياسىن دياگنوستيكالاۋ مەن ەمدەۋدىڭ زاماناۋي ادىستەرىمەن تانىستىرىپ, «جۇرەكالدى فيبريللياتسياسى كەزىندەگى كريوابلاتسيا» تاقىرىبىندا شەبەرلىك ءدارىسىن وتكىزدى.
ءوز ماماندىعىنىڭ مايتالمانى بولعان وسىنداي مامانداردىڭ شەبەرلىك ساباقتارى دارىگەرلەرىمىزگە بارلىق جينالعان اقپاراتتى جۇيەلەندىرۋگە جانە ونى تاجىريبەدە ۇتىمدى پايدالانۋعا مۇمكىندىك بەرەدى.
بۇل كۇندە ەلىمىزدەگى كارديولوگيا جانە ىشكى اۋرۋلار عزي – اريتمولوگيالىق ينتەرۆەنتسيالىق ارالاسۋلاردى كورسەتۋ جونىندەگى جەتەكشى ورتالىقتاردىڭ ءبىرى. تەك 2019 جىلى 800-دەن استام, ال سوڭعى 3 جىلدا – 2500-دەن استام ءساتتى وپەراتسيا جاسالدى.
الماتى