ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ناريمان مۇقىشەۆ اقتوبە وبلىسىنا اتاۋلى الەۋمەتتىك كومەكتى تاعايىنداۋدىڭ جاڭا تەتىكتەرىن (بۇدان ءارى – ااك) ءتۇسىندىرۋ ماقساتىنداعى جۇمىس ساپارى بارىسىندا وبلىستاعى ەڭبەك جانە حالىقتى الەۋمەتتىك قورعاۋ مينيسترلىگىنىڭ تسيفرلىق جوبالارىنىڭ جۇزەگە اسىرىلۋ بارىسىمەن تانىستى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلادى.
14 قاڭتاردا ۆيتسە-مينيستر اقتوبەدە ەرەكشە قاجەتتىلىكتەرى بار بالالارعا قىزمەت كورسەتەتىن «جاينا» وڭالتۋ ورتالىعىندا بولدى. 2019 جىلى ورتالىق پيلوتتىق جوبانى ىسكە اسىرۋ اياسىندا الەۋمەتتىك قىزمەتتەر پورتالىندا تىركەلگەن, ول مۇگەدەكتىگى بار ادامدارعا جەكە وڭالتۋ جوسپارىنا سايكەس وڭالتۋدىڭ تەحنيكالىق قۇرالدارى مەن قىزمەتتەردى ءوز بەتىنشە تاڭداۋعا مۇمكىندىك بەرەدى.
«بۇل ورتالىقتىڭ پيلوتتىق جوباعا قاتىسۋى وتە ماڭىزدى دەپ ەسەپتەيمىن, سەبەبى ول بالالارعا قىزمەت كورسەتەدى. پورتالدا وڭالتۋ شارالارىن تاڭداي وتىرىپ, اتا-انالار ۋاقىتتى ۇنەمدەپ, ءوز بالالارىنا ىڭعايلى فورماتتا وڭالتۋدى ۇيىمداستىرا الدى. قازىر ءبىز ءوز قىزمەتتەرىن ۇسىناتىن مەديتسينالىق-الەۋمەتتىك مەكەمەلەردىڭ سانى ۇنەمى ءوسۋى ءۇشىن بەلسەندى جۇمىس ىستەيمىز. بۇگىندە ەلىمىز بويىنشا وسىنداي 253 ۇيىم تىركەلگەن» دەدى مۇقىشەۆ.
اقتوبەدە پيلوتتىق رەجيمدە «ازاماتتىڭ الەۋمەتتىك كارتاسى» جوباسى بەلسەندى تۇردە جۇزەگە اسىرىلۋدا. بۇگىنگى تاڭدا الەۋمەتتىك كارتالار 40 مىڭعا جۋىق قالا تۇرعىنىنا, ونىڭ ىشىندە مەكتەپ وقۋشىلارىنا بەرىلدى. ولار الەۋمەتتىك تولەمدەر الۋعا, قوعامدىق كولىكتەردە جول جۇرۋگە جانە مەكتەپتە تاماقتانۋعا ارنالعان. تولەم كەزىندە يەسىنىڭ جەڭىلدىك ساناتى ەسكەرىلەدى.
«اقتوبە وبلىسى الەۋمەتتىك-ەڭبەك سالاسىن تسيفرلاندىرۋعا بەلسەندى قاتىسۋدا. مىسالى, قازىر ءبىز الەۋمەتتىك كارتامەن اۆتوبۋستا جول اقىسىن تولەۋدىڭ ىڭعايلىلىعىن, ءبارى قالاي جۇمىس ىستەيتىنىن تەكسەرەمىز. اقتوبە قالاسى جوبانى پيلوتتىق رەجيمدە ىسكە اسىرا باستاعان العاشقى قالا بولدى. ونىڭ 30 مىڭى –مەكتەپ وقۋشىلارى, 1,5 مىڭنان استام ترانزاكتسيا اقتوبە قالاسىندا كارتالارمەن جۇرگىزىلدى» دەدى ناريمان مۇقىشەۆ.
جەڭىلدىك ساناتىنداعى 2 مىڭنان استام مەكتەپ وقۋشىسى الەۋمەتتىك كارتالار الدى.
«مۇندا ءبىز ءۇشىن وتە ماڭىزدى ءسات بار. ءبىز مەكتەپتەردە تەگىن تاماقتانۋعا ءتيىستى وقۋشىلارعا قاتىستى مۇمكىن بولاتىن كەمسىتۋدى بولدىرماۋعا تىرىستىق. سوندىقتان دا مۇنداي مەحانيزمدى ويلاستىردىق: بالانىڭ جەڭىلدىك ساناتىنا جاتاتىنىنا نەمەسە جاتپاعانىنا قاراماستان, تۇسكى اس اقىسىن تولەۋ كەزىندە بارلىعىنا بىردەي چەك بەرىلەدى» دەپ تۇيىندەدى ۆيتسە-مينيستر.
ەستەرىڭىزگە سالا كەتەيىك, ەڭبەك جانە حالىقتى الەۋمەتتىك قورعاۋ مينيسترلىگى «تسيفرلىق قازاقستان» مەملەكەتتىك باعدارلاماسى اياسىندا ءىرى جوبالاردى جۇزەگە اسىرۋدا. ولاردىڭ ىشىندە ەلەكتروندىق ەڭبەك بيرجاسى, ەلەكتروندىق ەڭبەك شارتتارىن ەسەپكە الۋدىڭ بىرىڭعاي جۇيەسى, وتباسىنىڭ الەۋمەتتىك كارتاسى, ازاماتتىڭ الەۋمەتتىك كارتاسى, الەۋمەتتىك قىزمەتتەر پورتالى جانە ت.ب. بار. بۇدان باسقا, مينيسترلىكتىڭ 40 قىزمەتىن ەلەكتروندىق جانە پرواكتيۆتى فورماتقا كوشىرۋ بويىنشا بەلسەندى جۇمىس جۇرگىزىلۋدە.