بيىلدان باستاپ اتاۋلى الەۋمەتتىك كومەكتى كورسەتۋدىڭ جاڭا تەتىكتەرى ەنگىزىلدى. بۇل كومەك الەۋمەتتىك جاعدايى تومەن وتباسىلارعا تاعايىندالىپ كەلەدى. ااك تولەۋدىڭ جاڭا تەتىكتەرى, ازاماتتاردىڭ ءال-اۋقاتىن جاقسارتۋ شارالارى تۋرالى قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگىنىڭ الەۋمەتتىك كومەك ساياساتىن دامىتۋ دەپارتامەنتى ديرەكتورىنىڭ ورىنباسارى اياجان جانعابىلوۆا ايتىپ بەردى.
ونىڭ ايتۋىنشا, جاڭارتىلعان اتاۋلى الەۋمەتتىك كومەكتى تاعايىنداۋ شارتتارىندا ەڭ از كۇنكورىس دەڭگەيىنىڭ 70%-ىن تاعايىنداۋ شارتى بۇرىنعىداي بولىپ قالدى.
«ااك مولشەرى وتباسىنىڭ ءار مۇشەسى ءۇشىن ورتاشا جان باسىنا شاققانداعى تابىس پەن وتباسىنىڭ ءار مۇشەسىنىڭ ەڭ تومەنگى كۇنكورىس دەڭگەيىنىڭ 70%-ىنىڭ اراسىنداعى ايىرمانى قۇرايدى. تۇرمىسى تومەن وتباسىلارعا اقشالاي تولەمدەر تۇرىندە جانە ءوز ءىسىن باستاۋعا وقىتۋ, جۇمىسقا ورنالاسۋعا كومەكتەسۋ ارقىلى ولاردى ومىرلىك قيىن جاعدايدان شىعارۋعا ىقپال ەتەمىز», — دەدى دەپارتامەنت وكىلى.
سونىمەن قاتار, ەڭبەككە قابىلەتتى ازاماتتاردى جۇمىسقا ورنالاستىرۋ ءۇشىن «ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ مەملەكەتتىك باعدارلاماسىنىڭ بارلىق مەحانيزمدەرى پايدالانىلاتىن بولادى. ال جەكە كاسىپپەن اينالىسۋعا نيەتتى جاندار ءۇشىن جەڭىلدەتىلگەن شاعىن نەسيەلەر, بيزنەس اشۋ ءۇشىن قايتارىمسىز گرانتتار ۇسىنىلادى.
«بۇدان باسقا, بۇگىنگى كۇنى ەڭبەك نارىعىندا سۇرانىس بولماي وتىرعان ماماندىق يەلەرىن قايتا وقىتامىز, ياعني, ولاردىڭ كاسىبي بىلىكتىلىگىن ارتتىرۋى ءۇشىن جاعداي جاسايتىن بولامىز», — دەدى ا. جانعابىلوۆا.
وتباسىنىڭ تابىسىن انىقتاۋ جونىندەگى ۋچاسكەلىك كوميسسيالاردىڭ وتباسىنىڭ ماتەريالدىق جاعدايىنا تەكسەرۋ جۇرگىزۋ مەرزىمى 3 كۇننەن 7 كۇنگە دەيىن ۇزارتىلعان. سەبەبى, وتكەن جىلى اتاۋلى الەۋمەتتىك كومەكتى زاڭسىز الۋ ءۇشىن ازاماتتاردىڭ ءوز تابىسى مەن بيزنەسىن جاسىرۋ فاكتىلەرى ورىن العان ەدى: 2019 جىلى ءوزىنىڭ ناقتى تابىسىن جاسىرعان 73 مىڭنان اسا وتباسىنا ااك زاڭسىز تاعايىندالعان.
«وسىنداي كەلەڭسىزدىكتەرگە جول بەرمەۋ ماقساتىندا ۋچاسكەلىك كوميسسيالاردىڭ قۇزىرەتىنە جاڭا كريتەريلەر ەنگىزىلدى. سول كريتەريلەر بويىنشا وتباسىلاردىڭ مۇقتاجدىق دەڭگەيى انىقتالاتىن بولادى», — دەدى الەۋمەتتىك كومەك ساياساتىن دامىتۋ دەپارتامەنتى ديرەكتورىنىڭ ورىنباسارى.
اتاۋلى الەۋمەتتىك كومەكتى تاعايىنداۋ ءۇشىن وتباسىنىڭ كىرىسىن ەسەپتەۋدە دە جاڭا تەتىكتەر قاراستىرىلعان. اتاپ ايتقاندا, مۇگەدەك بالالارعا تولەنەتىن جاردەماقىنى, ستۋدەنتتەردىڭ شاكىرتاقىلارىن, «التىن القا», «كۇمىس القا», «باتىر انا» اتاقتارىمەن ماراپاتتالعان كوپ بالالى انالارعا بەرىلەتىن جاردەماقىلاردى, كەپىلدىك بەرىلگەن الەۋمەتتىك پاكەتتى قوسپاعاندا, ەڭبەك قىزمەتىنەن تۇسكەن تابىس پەن جاردەماقىنىڭ بارلىق تۇرلەرى ەسكەرىلەتىن بولادى.
«وتباسى شاعىن نەسيە مەن گرانت العان جاعدايدا العاشقى 6 ايدان كەيىنگى تابىسى كىرىس رەتىندە ەسكەرىلەدى. 2019 جىلى مەملەكەت باسشىسىنىڭ جارلىعى بويىنشا بىرقاتار ساناتتاعى ازاماتتاردىڭ بورىش جۇكتەمەسى تومەندەتىلگەن ەدى, بۇل دا وتباسىنىڭ تابىسى رەتىندە ەسەپتەلمەيدى», — دەدى دەپارتامەنت وكىلى.
ء تيىستى زاڭ اكتىلەرىندە كورسەتىلگەن وسى جانە وزگە دە شارتتاردىڭ بارلىعى اعىمداعى جىلدىڭ 5 قاڭتارىنان باستاپ كۇشىنە ەندى.