قۇرمانعازى اتىنداعى قازاق ۇلتتىق كونسەرۆاتورياسىنىڭ ءماجىلىس زالىندا پرەزيدەنت قاسىم-جومارت كەمەل ۇلى توقاەۆتىڭ اباي قۇنانباي ۇلىنىڭ 175 جىلدىعىنا وراي جاريالانعان «اباي جانە XXI عاسىرداعى قازاقستان» اتتى ماقالاسىن تالقىلاۋعا ارنالعان «اباي مۇراسى جانە قازىرگى زامانعى قازاقستان» تاقىرىبىنداعى دوڭگەلەك ۇستەل ءوتتى. بۇل تۋرالى مادەنيەت جانە سپورت مينيسترلىگىنىڭ ءباسپاسوز قىزمەتى حابارلادى.
جيىنعا كونسەرۆاتوريا باسشىلىعى, پروفەسسور-وقىتۋشىلىق قۇرامى مەن زيالى قاۋىم وكىلدەرى قاتىستى.
وتىرىستى كونسەرۆاتوريا رەكتورى ارمان جۇدەباەۆ اشىپ بەردى. «الەۋمەتتىك-گۋمانيتارلىق پاندەر» كافەدراسىنىڭ ۇستازى قارلىعاش ءماتجانوۆا قاسىم-جومارت كەمەل ۇلىنىڭ وزەكتى ماقالاسىن جينالعان كوپشىلىككە تانىستىردى. قارلىعاش ءماتجانوۆا مەملەكەت باسشىسىنىڭ ماقالاسىنداعى « ۇلتتىق بولمىستىڭ ۇلگىسى», «مەملەكەت ءىسىنىڭ مۇددەلەسى», «جاڭا قوعامنىڭ جاناشىرى», « الەمدىك مادەنيەتتىڭ تۇلعاسى», «تورقالى تويدىڭ تاعىلىمى» اتتى تاراۋلارعا جەكە-جەكە توقتالىپ, كوپشىلىككە ورتاق ماسەلەلەردى ورتاعا سالدى.
سونىمەن قاتار جيىندا بازارعالي جامانباەۆ, تامارا ساتىبالدينا, بازارحان قوسباساروۆ, ايجان بەردىباەۆا, ءاليا سابىروۆا سىندى بىلىكتى ۇستازدار ءوز ويلارىن ايتتى. جينالعان كوپشىلىك پرەزيدەنت ماقالاسىندا قوزعاعان ويلارىنا, كوتەرگەن ماسەلەلەرىنە, حالىققا جاساعان ۇندەۋىنە, قۇزىرلى ورگاندارعا قويعان ناقتى تاپسىرمالارىنا ءۇن قوستى.
«پرەزيدەنتىمىز قاسىم-جومارت كەمەل ۇلى بۇل ماقالاسىندا ءوزى ايتقانداي, سوزدەن ىسكە كوشۋ كەرەكپىز, اباي اتامىزدىڭ مۇرالارى ارقىلى, وسكەلەڭ ۇرپاق بويىنا ادامگەرشىلىكتىڭ, ادالدىقتىڭ, ەڭبەكقورلىقتىڭ, پاراساتتىلىقتىڭ ءدانىن ەگۋ كەرەكپىز. ابايدىڭ 175 جىلدىق مەرەيتويىنا قوعامدىق سانانى جاڭعىرتاتىن, ەلىمىزدىڭ دامۋىنا سەرپىن بەرەتىن ءىس-شارا رەتىندە زور ءمان بەرىپ, ناقتى ىسپەن كورسەتۋ كەرەكپىز» دەدى جيىن سوڭىندا ۇجىم باسشىسى ارمان ءادىلحان ۇلى.