سەنات دەپۋتاتى ءلاززات سۇلەيمەن الماتى قالاسىنا جۇمىس ساپارى اياسىندا «ادىلەت» جوعارى قۇقىق مەكتەبىندە كەزدەسۋ وتكىزدى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
شاراعا «ادىلەت» جوعارى قۇقىق مەكتەبىنىڭ دەكانى, ەلىمىزدىڭ جوعارى سوتى جانىنداعى عىلىمي-اقىلداستىق كەڭەسىنىڭ مۇشەسى, زاڭ عىلىمدارىنىڭ دوكتورى, پروفەسسور سۆەتلانا موروز, قازاقستان ۇلتتىق تۇتىنۋشىلار وداعىنىڭ باسقارما باسشىسى, قازاقستان مەدياتورلار وداعىنىڭ پرەزيدەنتى, اسسوتسيالانعان پروفەسسور سۆەتلانا رومانوۆسكايا, ادۆوكاتتار, عالىمدار مەن دوكتورانتتار قاتىستى.
كەزدەسۋ دەپۋتات باستاماشى بولعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سوتتان تىس جانە سوتقا دەيىنگى داۋلاردى رەتتەۋ ينستيتۋتتارىن دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى اياسىندا ءوتتى. وندا زاڭ جوباسىنا ەنگىزىلەتىن وزگەرىستەر قارالدى.
جۇزدەسۋگە قاتىسۋشىلار قازاقستانداعى مەدياتسيا ينستيتۋتىن ودان ءارى دامىتۋدىڭ كەلەشەگىن, سوتتان تىس جانە سوتقا دەيىن داۋلاردى رەتتەۋ ينستيتۋتتارىن مەملەكەتتىك رەتتەۋ تەتىكتەرىن, سونداي-اق مەدياتسياعا قاتىستى وزەكتى ماسەلەلەردى قىزۋ تالقىلادى.
كەزدەسۋ قورىتىندىسى بويىنشا جيناقتالعان ۇسىنىستار ۋاكىلەتتى مەملەكەتتىك ورگانداردىڭ, عالىمدار مەن ساراپشىلاردىڭ قاتىسۋىمەن وتەتىن جۇمىس توبىنىڭ وتىرىستارىندا قاراستىرىلىپ, زەرتتەلەتىن بولادى.