سەنات دەپۋتاتتارى پارلامەنت قابىلداعان زاڭداردى ءتۇسىندىرۋ جۇمىستارىن جالعاستىرىپ كەلەدى. سەناتور ەدىل مامىتبەكوۆ نۇر-سۇلتانداعى دوستىق ۇيىندە قازاقستان حالقى اسسامبلەياسىنىڭ مۇشەلەرىمەن كەزدەستى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
دەپۋتات پارلامەنتتىڭ زاڭ شىعارۋ قىزمەتى تۋرالى حاباردار ەتىپ, قابىلدانعان زاڭدار جايىندا ەگجەي-تەگجەيلى ايتىپ بەردى. دەپۋتات سونداي-اق دەنساۋلىق ساقتاۋدى دامىتۋدىڭ 2020-2025 جىلدارعا ارنالعان مەملەكەتتىك باعدارلاماسىنىڭ باسىمدىقتارى مەن ورىندالۋ بارىسىن ءتۇسىندىرىپ بەردى.
كەزدەسۋ بارىسىندا «مەملەكەتتىك ساتىپ الۋ تۋرالى» زاڭنىڭ قوعامدىق بىرلەستىكتەردەگى ورىندالۋى كوتەرىلدى.
قالالىق ءماسليحات دەپۋتاتتارىمەن بىرگە ەلوردانى ارالاۋ بارىسىندا ە.مامىتبەكوۆ استانالىق №95 بوبەكجاي-باقشاسىندا, ومىرلىك قيىن جاعدايدا جۇرگەن بالالار ورتالىعىندا جانە «№1 ارنايى مەكتەپ-ينتەرناتتا» بولىپ قايتتى. 325 بالانى وقىتۋعا ەسەپتەلگەن مەكتەپ-ينتەرناتتا ناقتى 527 ادام وقيدى. جالپى ەلوردادا اۋتيزم, تسەرەبەرالدى پاراليچ, ەستۋ, كورۋ ورگاندارى مەن باسقا دا ناۋقاستارى بار 9 مىڭنان استام ەرەكشە بالالار تۇرادى. ءماسليحات دەپۋتاتى ز.ءجۇسىپوۆانىڭ ايتۋىنشا, جالپى ءبىلىم بەرەتىن مەكتەپتەر بىلىكتى كادرلاردىڭ جەتىسپەۋشىلىگىنەن ەرەكشە بالالاردى وقىتۋعا دايىن ەمەس. ە.مامىتبەكوۆ ارنايى مەكتەپتەردىڭ جەتىسپەۋى مەن ەرەكشە قاجەتتىلىكتەرى بار بالالاردى الەۋمەتتىك قامتاماسىز ەتۋ ماسەلەلەرىن شەشۋ قاجەتتىگى تۋرالى ءتيىستى ورگاندارعا دەپۋتاتتىق ساۋال جولدايتىنىن جەتكىزدى.
سەناتور سونداي-اق جاڭا تەننيس ورتالىعىنىڭ جۇمىسىمەن تانىسىپ, I-5 (جاستار) اۋدانىنداعى نوسەر جاڭبىردى تازارتۋ كارىزىنىڭ قۇرىلىستارىن كوردى.