شىمكەنت قالاسىنىڭ اكىمى ەرلان ايتاحانوۆ ەلىمىزدىڭ ءۇشىنشى مەگاپوليسىنە ارنايى جۇمىس ساپارىمەن كەلگەن پارلامەنت ءماجىلىسىنىڭ دەپۋتاتتارىمەن كەزدەستى. بۇل تۋرالى شىمكەنت قالاسى اكىمدىگىنىڭ ءباسپاسوز قىزمەتى حابارلادى.
ولاردىڭ قاتارىندا دارحان مىڭباي, نۇرجان التاەۆ جانە فاحريددين قاراتاەۆ بار. كەزدەسۋدە قالانىڭ الەۋمەتتىك-ەكونوميكالىق دامۋى مەن الدا اتقارىلار جۇمىستاردىڭ جايى ءسوز بولدى. قالا باسشىسى ءتۇرلى مەملەكەتتىك باعدارلامالاردىڭ قالادا ءوز دەڭگەيىندە جۇزەگە اسىرىلىپ وتىرعانىن جەتكىزىپ, شىمكەنت حالىقتىڭ سانىمەن عانا ەمەس, ەكونوميكالىق قۋاتىمەن دە قارقىندى ءوسىپ كەلەتىنىن اتاپ ءوتتى.
«وتكەن جىلدىڭ 11 ايى بويىنشا ونەركاسىپ ءونىمى - 16,4 پايىزعا, اۋىل شارۋاشىلىعى ءونىمى - 5,5 پايىزعا, پايدالانۋعا بەرىلگەن تۇرعىن ۇيلەر كولەمى - 15,3 پايىزعا, ال بولشەك ساۋدا كولەمى 7,1 پايىزعا ارتتى. قالادا 2 يندۋستريالىق ايماق جۇمىس ىستەيدى, ولاردىڭ جەرى 100% يگەرىلگەن. بۇگىنگى كۇنگە قۇنى 42 ملرد تەڭگەلىك 67 جوبا ىسكە قوسىلىپ, 4 مىڭعا جۋىق ادام جۇمىسپەن قامتىلدى. اشىلعالى مەملەكەتتىك بيۋدجەتكە 16 ملرد تەڭگە كولەمىندە سالىق ءتۇستى. بۇل باعىتتاعى جۇمىستار بيىل دا جالعاسادى» دەدى قالا اكىمى.
مەملەكەت باسشىسىنىڭ باستاماسىمەن جۇزەگە اسىپ وتىرعان باعدارلامالاردىڭ ورىندالۋىنا قانىققان حالىق قالاۋلىلارى الداعى ۋاقىتتا دا شىمكەنت قالاسىنىڭ ءوسىپ-وركەندەۋى جولىنداعى جوبالارعا بارىنشا ءوز ۇلەستەرىن قوسىپ, قولداۋ بىلدىرەتىندەرىن جەتكىزدى.