وبلىس اكىمى قۋانىشبەك ىسقاقوۆتىڭ سولتۇستىك اۋداندارعا ساپارى قازالى اۋدانىندا قايتا جالعاستى. ايماق باسشىسى سىرداريا وزەنىنىڭ ارعى بەتىندە ورنالاسقان 8 اۋىلدا بولىپ, «قارلاڭ» ۋچاسكەسىندەگى قالقىمالى كوپىردىڭ جاعدايىمەن تانىستى. بۇل تۋرالى قازالى اۋدانى اكىمىنىڭ ءباسپاسوز قىزمەتى حابارلادى.
ايماق باسشىسى الدىمەن مايداكول, ءۇ.تۇكتىباەۆ اۋىلدارى تۇرعىندارىنىڭ ءوتىنىش-تىلەكتەرىنە قۇلاق ءتۇردى.
اقجونا اۋىلدىق وكرۋگى اۋدانداعى اۋىز سۋ سەرۆيستىك جەلىگە قوسىلماعان 3 اۋىلدىڭ ءبىرى. سوندىقتان مايداكولدىكتەر الدىمەن وسى ماسەلەنى كوتەردى. سونداي-اق اۋىلعا جاڭا كلۋب عيماراتىن سالۋ كەرەكتىگىن دە جەتكىزدى. سەبەبى, اۋىل كلۋبى وسىدان ون جىل بۇرىن اسار ادىسىمەن سالىنعان.
ال, كەڭەس وداعىنىڭ باتىرى ءۇرماش تۇكتىباەۆ اتىنداعى اۋىل تۇرعىندارى 2019 جىلى اۋىز سۋ ءاربىر ۇيگە كىرگىزىلىپ, 7 كوشە ورتاشا جوندەۋدەن وتكىزىلگەنىنە قۋانىشتى ەكەندىكتەرىن جەتكىزدى. اۋىل تۇرعىنى تورەمۇرات ءتاجىمۇراتوۆ بەكارىستان بيدەن اۋىلعا دەيىنگى جولدى جوندەۋ, بالاباقشا جانە سپورت كەشەنىن سالۋ جونىندە ۇسىنىس ايتتى.
مۇنان سوڭ ايماق باسشىسى قوجاباقى, بوزكول, كاۋكەي, تاسارىق, بىرلىك, جانكەنت اۋىلدارىندا دا بولىپ, حالىقتىڭ تۇرمىس-تىرشىلىگىمەن تانىستى. اۋىلداعىلار جول, كەڭ جولاقتى ينتەرنەت جەلىسىن تارتۋ, عيماراتى ەسكىرگەن بالاباقشالار مەن اۋىلدىق كلۋب ۇيلەرىن جاڭارتۋ, سپورت كەشەنىن سالۋ جايلى ءوتىنىش ايتتى. ال, بىرلىك پەن جانكەنت اۋىلىنىڭ تۇرعىندارى «قارلاڭ» ۋچاسكەسىنە تەمىر بەتون كوپىر سالۋ قاجەت دەيدى.
قۋانىشبەك دوسمايىل ۇلى «قارلاڭ» ۋچاسكەسىنە تەمىر بەتون كوپىر سالۋ ءۇشىن تەحنيكالىق ەكونوميكالىق نەگىزدەمەلەرى دايىن ەكەندىگىن, ەندى جوبا-سمەتالىق قۇجاتتارىن دايىنداۋ ءۇشىن قاجەتتى قارجى بولىنەتىنىن جەتكىزدى. ال, كلۋب, بالاباقشا, دارىگەرلىك امبۋلاتوريا, سپورت كەشەنىن جەرگىلىكتى كاسىپكەرلەرمەن بىرلەسىپ مەملەكەتتىك-جەكەشەلىك ارىپتەستىك نەگىزىندە سالۋ جولدارىن قاراستىراتىنىن ايتتى.