جاڭا جىلدىڭ العاشقى كۇندەرىندە نۇر-سۇلتان, الماتى جانە شىمكەنت قالالارىندا وتكەن رەسپۋبليكالىق پاندىك وليمپيادادا قىزىلوردا قالاسىنداعى نازارباەۆ زياتكەرلىك مەكتەپ وقۋشىلارى ءبىلىم بيىگىنەن كورىنىپ, 4 كۇمىس جانە 3 قولا مەدال يەلەندى. بۇل تۋرالى قىزىلورداداعى نزم ءباسپاسوز قىزمەتى حابارلادى.
نازارباەۆ زياتكەرلىك مەكتەپتەر جەلىسىندە ءداستۇرلى تۇردە وتكىزىلەتىن پاندىك وليمپياداعا ەلىمىز بويىنشا 800-گە جۋىق وقۋشى قاتىسىپ, بىلىمدەرىن ورتاعا سالدى. نۇر-سۇلتان قالاسىنا جينالعاندار قازاقستان تاريحى, قۇقىق نەگىزدەرى, ماتەماتيكا جانە فيزيكا پاندەرىنەن سايىسقا تۇسسە, قازاق, ورىس, اعىلشىن, نەمىس, فرانتسۋز تىلدەرىنىڭ بىلگىرلەرى شىمكەنتتەگى فيزيكا-ماتەماتيكا باعىتىنداعى زياتكەرلىك مەكتەپتە ءوزارا باق سىناستى. ال الماتىداعى حيميا-بيولوگيا باعىتىنداعى نازارباەۆ زياتكەرلىك مەكتەبىندە وليمپيادا قاتىسۋشىلارى ينفورماتيكا, حيميا, بيولوگيا, گەوگرافيا پاندەرى بويىنشا ءبىلىم تالاستىردى.
ناعىز ءبىلىمدى انىقتالار بايقاۋدا قىزىلوردالىق ورەندەر جۇلدەلى جەتى ورىنعا يە بولدى. اتاپ ايتقاندا, 11-سىنىپ وقۋشىسى ايىم سەكسەنباەۆا جانە 10-سىنىپ وقۋشىسى ايگەرىم تۇرماحانوۆا قازاق ءتىلى مەن ادەبيەتى پانىنەن ءۇشىنشى جانە ەكىنشى ورىنداردى الدى. ال 11-سىنىپ وقۋشىسى گۇلشات قالباەۆا مەن مەكتەپ ءبىتىرۋشى ساودات قۇرماناەۆا ورىس ءتىلى پانىنەن كۇمىس مەدالعا قول جەتكىزدى. 10-سىنىپتاعى جانگەرەي زەينەلوۆ پەن 11-سىنىپتان ءادىل داستان وليمپيادادا قازاقستان تاريحى ءپانى بويىنشا سايىسقا ءتۇسىپ, ەكىنشى جانە ءۇشىنشى ورىنداردى يەلەندى. سونىمەن قاتار گەوگرافيا پانىنەن دە وقۋشىلار ۇزدىك ناتيجە كورسەتىپ, 11-سىنىپ وقۋشىسى الىشەر التىنباسوۆ قولا مەدالمەن ماراپاتتالدى.