قىزىلوردا وبلىسىنىڭ اكىمى قۋانىشبەك ىسقاقوۆ ارال اۋدانىنداعى شالعاي اۋىلدار مەن ەلدى مەكەندەر جاعدايىمەن تانىستى. بۇل تۋرالى وبلىس اكىمىنىڭ ءباسپاسوز قىزمەتى حابارلايدى. ايماق باسشىسىمەن كەزدەسۋدە اۋىل تۇرعىندارى بىرقاتار ماسەلە كوتەردى.
ارىقبالىق اۋىلدىق وكرۋگى تۇرعىندارى سوڭعى بەس جىلدا كاسىپكەرلىك ماقساتتا 100 ميلليون تەڭگەگە جۋىق نەسيە الىپ, وسىنىڭ ارقاسىندا اۋىلدا جۇمىسسىزدار سانى ازايعان. بىلتىر اۋىل شارۋاشىلىعى جانە باسقا بيزنەس سالاسى بويىنشا 40 ميلليون تەڭگەگە دەيىن نەسيە راسىمدەلگەن.
وبلىس اكىمى ءار كەزدەسۋدە تۇرعىنداردىڭ ۇسىنىس-پىكىرلەرىن مۇقيات تىڭداپ, ءتيىستى اتقارۋشى ورگان جەتەكشىلەرىنە ناقتى تاپسىرما بەرىپ وتىردى. جاڭاقۇرىلىس اۋىلىنداعى ماسەلەنىڭ ءبىرى – داريا ارناسىنان كولگە تارتىلعان توسپالاردىڭ ىسكە جارامسىزدىعى. بۇعان بايلانىستى ايماق باسشىسى ماسەلە نازارعا الىناتىنىن ايتتى. ەلدەگى وتكەن كەزدەسۋلەردە امانوتكەل اۋىلى تۇسىندا ورنالاسقان قالقىمالى كوپىردى جاڭارتۋ مەن قاراشالاڭ ەلدى مەكەنىنىڭ جول ماسەلەسى دە ايتىلدى.
سونداي-اق وبلىس اكىمى اقەسپە, مەرگەنساي, جاقسىقىلىش, توقاباي, سازدى جانە قوسامان اۋىلدارىندا بولىپ, اۋىل تۇرعىندارىنىڭ ماسەلەسىن تىڭدادى. مەرگەنساي اۋىلدىق وكرۋگىنە قاراستى جالاڭاش ەلدى مەكەنىندەگى كەزدەسۋدە تۇرعىندار ەلدە جەدەل جاردەم كولىگى جوقتىعىن ايتىپ, وبلىس باسشىسىنا وتىنىشتەرىن ءبىلدىردى. قۋانىشبەك دوسمايىل ۇلى بيىل جاڭا جەدەل جاردەم كولىگى بەرىلەتىندىگىن ايتىپ, اۋىل حالقىن قۋانتتى.
اكىم ساپارى جاقسىقىلىش كەنتىندە جالعاستى. قازاقستاننان بولەك, سىرت ەلدەرگە تۇز ءونىمىن ەكسپورتتايتىن جاقسىقىلىشقا بيىل گاز قۇبىرى تارتىلادى. وبلىس اكىمى وسى جاعىمدى جاڭالىقتى كەنت تۇرعىندارىنا جەتكىزدى.
- گاز ماسەلەسى جاقىن ارادا شەشىلەدى. رەسپۋبليكالىق جانە وبلىستىق بيۋدجەتتەن كەنتىشىلىك گاز قۇبىرلارىن جۇرگىزۋگە 670 ميلليون تەڭگەدەن استام قارجى قاراستىرىلعان. كۇن جىلىنا سالىسىمەن قۇرىلىس جۇمىستارى جالعاسىن تابادى. بۇل اتقارىلىپ جاتقان يگىلىكتى ءىستىڭ ءبارى ەل تاۋەلسىزدىگىنىڭ جەمىسى ەكەنىن وزدەرىڭىز دە بىلەسىزدەر. سونداي-اق تۇز وندىرۋدە, ونىڭ ساپاسى جاعىنان ءبىزدىڭ ارالدىڭ ءونىمى دۇنيەجۇزى بويىنشا الدىڭعى قاتاردا تۇر. سونداي-اق كەنت ىشىندەگى جولدارعا قۇجاتتار ازىرلەنگەن, بيىل «اۋىل - ەل بەسىگى» باعدارلاماسى اياسىندا ءتيىستى سالالىق مينيسترلىككە جوبا دا ۇسىنىلدى. ەندى سول قاجەتتى قارجىنى تەزىرەك شەشۋدى جاۋاپتى باسقارما باسشىلىعىنا ارنايى تاپسىرامىن, – دەدى ايماق باسشىسى تۇرعىندارمەن كەزدەسۋدە.
تاعى ءبىر جاڭالىق, توقاباي اۋىلىنا كىرە بەرىس 2 شاقىرىمنان ارى جولدى ورتاشا جوندەۋگە رەسپۋبليكالىق بيۋدجەتتەن 42,7 ملن, ال وبلىستان 5 ملن تەڭگە قارجى ءبولىنىپ, جول بيىل جوندەلەتىن بولدى. ايماق باسشىسى جاۋاپتى باسقارماعا جۇمىستىڭ ساپالى جانە ۋاقىتىلى جۇرگىزىلۋىن تاپسىرىپ, ءوزىنىڭ باقىلاۋىندا بولاتىنىن ايتتى.
ايماق باسشىسى قاراقۇم, سازدى, قوسامان, اقەسپە اۋىلدارىنا دا بارىپ, جۇرتشىلىقتى تولعاندىرعان ماسەلەلەردى تالقىلادى.
قىزىلوردا وبلىسى