نۇر-سۇلتان قالاسىندا وتكەن ماتەماتيكا ءپانى مۇعالىمدەرىنىڭ فەستيۆالى شەڭبەرىندەگى شارادا قىزىلورداداعى نازارباەۆ زياتكەرلىك مەكتەبىنىڭ مۇعالىمى بايمەن ءسابيت ءوز بىلىكتىلىگىمەن ەرەكشەلەنىپ, 3-ورىن يەگەرى اتاندى. بۇل تۋرالى قىزىلوردداعى نزم ءباسپاسوز قىزمەتى حابارلادى.
ءۇشىنشى رەت جالاۋىن كوتەرگەن فەستيۆالگە رەسپۋبليكا بويىنشا نازارباەۆ زياتكەرلىك مەكتەپتەرىنەن 100-گە جۋىق پەداگوگ قاتىسقان. ءۇش كۇنگە سوزىلعان شارادا قاتىسۋشىلار ءپاندى وقىتۋداعى وزەكتى ماسەلەلەرگە ارنالعان تاقىرىپتىق سەميناردا تاجىريبە الماسىپ, وقۋشىلاردىڭ ءبىلىم دەڭگەيىن ارتتىرۋعا باعىتتالعان تىڭ يدەيالارىمەن ءبولىستى.
فەستيۆال بارىسىندا قاتىسۋشىلار ارنايى وتكىزىلگەن وليمپيادادا كۇردەلى ەسەپتەردى شىعارۋ ارقىلى لوگيكالىق قابىلەتتەرىمەن سىنعا ءتۇستى. ناتيجەسىندە قىزىلوردالىق بايمەن ءسابيت جوعارى ۇپاي جيناپ, ۇزدىك ۇشتىكتىڭ قاتارىنان كورىنە ءبىلدى. وليمپيادانىڭ ءۇشىنشى ورىن يەگەرى اتانعان جاس ماتەماتيك بۇل فەستيۆال بارلىق پەداگوگتەر ءۇشىن وزىق تاجىريبە الماسۋ الاڭى بولعانىن ايتادى.
وزگە زياتكەرلىك مەكتەپ مۇعالىمدەرىنىڭ اتقارىپ جاتقان جۇمىستارىن كورىپ, ءوزىمىزدىڭ تاجىريبەمىزبەن دە ءبولىسۋ مۇمكىندىگىن الدىق. زاماناۋي ءبىلىم بەرۋدە قاجەتتى وقىتۋ ادىستەمەلەرى مەن ماتەماتيكا پانىنە دەگەن قىزىعۋشىلىقتى ارتتىراتىن تاسىلدەر قاراستىرىلعان سەمينارلاردا بارلىق قاتىسقان ۇستازدار جاڭا يدەيالار مەن موتيۆاتسيالار الدى دەپ ويلايمىن, – دەدى بايمەن ءسابيت.