قازاقستان رەسپۋبليكاسى پارلامەنتى سەناتىنىڭ دەپۋتاتتارى بەكمىرزا ەلامانوۆ, مۇرات باقتيار ۇلى جانە دانا نۇرجىگىت قازالى اۋدانىنا جۇمىس ساپارىمەن كەلىپ, ە.بوزعۇلوۆ اتىنداعى №249 مەكتەپ-ليتسەيدە كەزدەسۋ وتكىزدى.
كەزدەسۋ بارىسىندا مۇرات باقتيار ۇلى مەملەكەت باسشىسىنىڭ تاپسىرماسى بويىنشا پارلامەنت قابىرعاسىندا اتقارىلىپ جاتقان جۇمىستار, قابىلدانعان زاڭدار مەن الداعى ۋاقىتتا دەپۋتاتتاردىڭ نازارىنا ۇسىنىلاتىن جوبالار توڭىرەگىندە كەڭىنەن اڭگىمەلەپ بەردى.
ال دانا نۇرجىگىت الەۋمەتتىك ماسەلەلەر, كوپبالالى وتباسىلارعا بەرىلەتىن جاردەماقى, مىندەتتى الەۋمەتتىك مەديتسينالىق ساقتاندىرۋ, اتاۋلى الەۋمەتتىك كومەك جۇيەسىنە ەنگىزىلگەن وزگەرىستەر جونىندە تۇسىندىرمە جاسادى.
دەپۋتاتتار جيىنعا قاتىسقان ءبىلىم سالاسىنىڭ قىزمەتكەرلەرى مەن ارداگەرلەرىنىڭ سۇراقتارىنا جاۋاپ بەردى. اۋدان اكىمى مۇرات ەرگەشباەۆ اۋدانعا ارنايى جۇمىس ساپارىمەن كەلگەن دەپۋتاتتارعا العىسىن ايتتى.
سەناتورلار اۋدانعا جۇمىس ساپارى بارىسىندا «سىر مارجانى» جشس-نىڭ مال بورداقىلاۋ الاڭىنىڭ جۇمىسىن كورىپ, اقتان باتىر اۋىلىنداعى ورتالىق ساياباق, جاقىندا اشىلعان السەيىت كوپىرىمەن تانىستى. ايتەكە بي كەنتىندەگى اۋداندىق مەكەمەلەر ۇيىندە اۋدان اكىمى مۇرات ەرگەشباەۆ سەنات دەپۋتاتتارىنا «اشىق اكىمدىك» جوباسى اياسىندا جۇمىس ىستەيتىن كابينەتتەردى كورسەتتى.