وتكەن جىل قورىتىندىسىمەن قىزىلوردا وبلىسىندا «قاراپايىم زاتتار ەكونوميكاسى» باعدارلاماسى بويىنشا جالپى قۇنى 6,6 ملرد.تەڭگە بولاتىن 47 جوبا ماقۇلدانعان. بۇل تۋرالى وبلىستىق كاسىپكەرلەر پالاتاسى ديرەكتورىنىڭ ورىنباسارى قوجاحمەت ءىلياسوۆ ايتتى.
ونىڭ ايتۋىنشا «قاراپايىم زاتتار ەكونوميكاسىن» دامىتۋ جونىندەگى وڭىرلىك جوبالىق كەڭسەنىڭ قاراۋىندا جالپى سوماسى 11,2 ملرد.تەڭگەنى قۇرايتىن 105 جوبا بار. ونىڭ ىشىندە 47 جوبانى بانكتەر مەن اگرارلىق نەسيە كورپوراتسياسى ماقۇلداپ, جۇزەگە اسىرىلۋدا. ون سەگىز جوبا قارجى ينستيتۋتتارىندا قارالىپ جاتسا, قالعاندارىنا قاجەتتى قۇجاتتار جيناقتالۋدا.
بىلتىر «قاراپايىم زاتتار ەكونوميكاسى» سالالارىن دامىتۋ شەڭبەرىندە باسىم جوبالارعا جەڭىلدەتىلگەن نەسيە بەرۋدىڭ باعدارلاماسى ىسكە قوسىلدى. باعدارلامانى ىسكە اسىرۋ بارىسىندا شۇعىل تۇردە كەدەرگىلەردى انىقتاپ, جويۋ ماقساتىندا ۇكىمەت باسشىسىنىڭ تاپسىرماسىمەن «اتامەكەن» ۇلتتىق كاسىپكەرلەر پالاتاسى الاڭىندا جوبالىق كەڭسەلەر قۇرىلدى. قىزىلوردادا وڭىرلىك جوبالىق كەڭسەنىڭ تەڭ توراعالارى – وبلىس اكىمىنىڭ ورىنباسارى مۇرات يماندوسوۆ پەن كاسىپكەرلەر پالاتاسىنىڭ ديرەكتورى عالىمبەك جاقسىلىقوۆ.
جىل بويى جوبالىق كەڭسە مۇشەلەرى كاسىپكەرلەرمەن كەزدەسىپ, ولاردىڭ ۇسىنىستارى مەن پروبلەمالارىن جۇيەلەپ, ورتالىققا ۇسىنىپ وتىردى. وسىنىڭ ناتيجەسىندە قىسقا مەرزىمدە ۇكىمەت قاۋلىسىنا 3 رەت تولىقتىرۋ ەنگىزىلىپ, نەسيەلەندىرۋ شارتتارى تۇبەگەيلى قايتا قارالدى.
ءبىزدىڭ وبلىسىمىز بويىنشا وڭىرلىك جوبالىق كەڭسەنىڭ ۇسىنىسىمەن جىلقى, تۇيە, قوي, ەشكى, قۇس, تاۋىق, قاز, بالىق ءوسىرۋ, تۇزدى قايتا وندەۋ, بەتوننان ماتەريالدار, سيليكات كىرپىشىن شىعارۋ, مەديتسينالىق مەكەمە سالۋ, جوندەۋ جانە ولاردى مەديتسينالىق جابدىقتارمەن جابدىقتاۋ سياقتى ايماق ءۇشىن وزەكتى قىزمەت تۇرلەرى ەنگىزىلدى, دەيدى پالاتا ديرەكتورىنىڭ ورىنباسارى.