قازاقستاندىقتار 1 ساۋىرگە دەيىن ءمامس جۇيەسىندە تىركەلۋى كەرەك

اعىمداعى جىلدىڭ 1 ساۋىرىنە دەيىن ەلدىڭ بارلىق تۇرعىندارى شارتتى تۇردە ساقتاندىرىلعان بولىپ سانالادى جانە ولار تمككك پاكەتى مەن ءمامس پاكەتىنە كىرەتىن مەديتسينالىق قىزمەتتەردى تەگىن الۋ مۇمكىندىگىنە يە. وسى كەزەڭدە ازاماتتار وزدەرىنىڭ ساقتاندىرۋ مارتەبەسىن انىقتاپ, مىندەتتى مەديتسينالىق ساقتاندىرۋ جۇيەسىنىڭ قاتىسۋشى بولۋى كەرەك.

مىندەتتى الەۋمەتتىك مەديتسينالىق ساقتاندىرۋ قورىنىڭ باسقارما توراعاسى ايباتىر جۇماعۇلوۆ ايتۋىنشا,  ءمامس پاكەتىنە كەپىلدەندىرىلگەن مەديتسينالىق كومەكتەن باسقا دا قىزمەتتەردىڭ بارلىعى ەنەدى.

ء«مامس پاكەتىنە مەملەكەت تاراپىنان كەپىلدەندىرىلگەن مەديتسينالىق كومەك پاكەتىنەن باسقا مەديتسينالىق قىزمەتتىڭ – ءدارى-دارمەكپەن قامتاماسىز ەتۋ, ستاتسيونارلىق ەم الۋ سياقتى كەڭ كولەمدى قىزمەت تۇرلەرى كىرەدى. بۇدان باسقا, ساقتاندىرىلعان ازاماتتار ءۇشىن ءتۇرلى وتالار, ولاردىڭ ىشىندە قىمبات تۇراتىن وتالار دا قولجەتىمدى بولماق. بۇگىندە ونداي وتالار ءتۇرلى سەبەپپەن قولجەتىمسىز – مەملەكەت ەسەبىنەن كەزەك كوپ, ال ءوز ەسەبىنەن تولەۋگە قارجى جوق. وسى ورايدا, مىندەتتى الەۋمەتتىك مەديتسينالىق ساقتاندىرۋدى ەنگىزۋدىڭ پايداسى – باسەكەلەستىك ەسەبىنەن مەديتسينالىق قىزمەت ساپاسى ارتاتىن بولادى. ناۋقاستار كوپ كەلەتىن بىلىكتى دارىگەرلەردى تارتۋ ارقىلى پاتسيەنتتەرگە ەڭ جاقسى قىزمەت كورسەتەتىن كلينيكالارعا قاراجات تا كوپ بولىنەدى» دەدى ول.

جالپى الەۋمەتتىك مەديتسينالىق ساقتاندىرۋ ەنگىزىلگەن كەزدە, دەنساۋلىق ساقتاۋ جۇيەسىنىڭ بيۋدجەتى مەديتسينالىق كومەكتىڭ كولەمىن 1,5 ەسەگە ۇلعايتا وتىرىپ, 2020 جىلى 1,6 ترلن تەڭگەنى قۇرايتىن بولادى. سونىمەن قاتار دارىگەرلەردىڭ جالاقىسىن 30%-عا, ورتاشا مەديتسينالىق قىزمەتكەرلەردى 20%-عا دەيىن ارتتىرۋ جوسپارلانۋدا.

مىندەتتى الەۋمەتتىك مەديتسينالىق ساقتاندىرۋ قورىنىڭ جۇمىسىنا, تولەم ادىستەرىنە قاتىستى سۇراقتاردىڭ جاۋابىن قازاقستاندىقتار 1406 نومىرىنە حابارلاسىپ الۋىنا بولادى.