ەلوردالىق دوستىق ۇيىندە نۇر-سۇلتان قالاسى قازاقستان حالقى اسسامبلەياسىنىڭ جاڭاجىلدىق قايىرىمدىلىق شىرشاسى ءوتتى. شاراعا 100-گە جۋىق بالالار مەن اتا-انالار قاتىستى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.
جاڭا جىلدىق قايىرىمدىلىق شىرشاسىنىڭ نەگىزگى ماقساتى – از قامتىلعان جانە كوپبالالى وتباسىلاردان شىققان, جەتىم بالالار مەن اتا-اناسىنىڭ قامقورلىعىنسىز قالعان جانە مۇگەدەك بالالارعا كومەك كورسەتۋ, سونداي-اق ولارعا مەرەكەلىك كوڭىل-كۇي سىيلاۋ.
دوستىق ءۇيىنىڭ كونتسەرتتىك زالىندا وتكەن شاراعا 100-گە جۋىق بالالار مەن اتا-انالار قاتىستى. ولاردىڭ اراسىندا تانىمال پروديۋسەر الپامىس ءشارىموۆ, جايدارمانشى عالىم ماحامبەتوۆ پەن ۇلى راسۋل دا بولدى. اياز اتا مەن اقشاقار, ميككي ماۋس پەن گرينچ, مينون جانە تەمىر ادام بەينەسىندەگى ەرتەگى كەيىپكەرلەرى قويىلىمدار قويىپ, بۇلدىرشىندەردى ەرەكشە اسەردە قالدىردى. ارنايى ويىندار مەن كونتسەرتتىك باعدارلاما دا ۇيىمداستىرىلدى.
مەرەكە سوڭىندا ءار بالاعا جاڭا جىلدىق سىيلىقتار تابىستالدى. وڭىرلىك ەتنومادەني بىرلەستىك وكىلدەرى دە بالالاردى جاڭا جىل مەرەكەسىمەن قۇتتىقتاپ, يگى لەبىزدەرىن ءبىلدىردى.