باياناۋىلدا بولسا, ءبىر ءسارى. قازاعى از, وزگە ۇلت وكىلدەرى باسىمداۋ ورنىققان ۋسپەن اۋدانىندا ء«ان مەن جىردان اق شاشۋ» دەپ اتالاتىن ءداستۇرلى انشىلەر فەستيۆالى وتكەنى ءبىزدى ەرىكسىز ەلەڭ ەتكىزدى. بۇل – وسى اۋدانعا قونىستانعان قىتايدان ەلگە ورالعان قانداس باۋىرلارىمىزدىڭ باستاماسى.
قىزىلوردا, ماڭعىستاۋ, الماتى, كوكشەتاۋ وڭىرلەرىنىڭ ورىنداۋشىلارى قاتىسقان فەستيۆال ابايدىڭ 175 جىلدىعىنا, تاۋەلسىزدىك مەرەكەسىنە ارنالدى.
ءداستۇرلى ءان كەشىن جەرگىلىكتى جاس اقىن, تەرمەشى جىگەر بوكەن ارناۋ انىمەن باستاپ بەردى. ءانشى ەربول ايتباەۆ ەستايدىڭ اندەرىن اۋەلەتسە, «تەكتى ءسوزدىڭ تورەسى – تەرمە» بايقاۋىنىڭ جۇلدەگەرى سالتانات قيساتوۆا اتاقتى مايرانىڭ اندەرىن شىرقادى.
ءانشى-جىرشى, تەرمەشىلەر ساحنا تورىنە تىگىلگەن كيىز ءۇيدىڭ ىشىندە بۇرىنعى سال-سەرىلەردەي بىرىنەن سوڭ ءبىرى ورتاعا شىعىپ, ءوز وڭىرلەرىنىڭ ماقامىنا ساي ەكى اننەن ورىندادى.
الدىمەن ءبىرجان سال, اقان سەرى, بالۋان شولاق, ۇكىلى ىبىرايلاردىڭ ءىزىن باسىپ, ۇكىلى دومبىرانى سەرىك ەتكەن كوكشەتاۋلىق سەرىلەر كورىندى.
ارقانىڭ ءداستۇرلى ءان مەكتەبىنىڭ تۇلەگى نازيرا بەيسەنوۆا بۇقار جىراۋدىڭ «باتىرىڭ ءولدى, بوگەنباي!» دەپ اتالاتىن تولعاۋىن, ۇكىلى ىبىرايدىڭ «گاككۋىن» ۇسىندى.
كەلەسى ساتتە سىر ءداستۇرلى ءان مەكتەبىنىڭ كورنەكتى وكىلدەرى نۇرتۋعان, جيەنباي, نارتاي, سارسەنباي جىراۋلاردىڭ ماقامدارىمەن جىر ايتۋ ءداستۇرىن جالعاپ جۇرگەن مارات سۇگىرباي تۇرماعامبەتتىڭ «وسيەت», شوراياقتىڭ ومارىنىڭ ء«ادىل ءىس» تەرمەسىن, حالىق ءانى ء«شيلى وزەندى» ورىنداپ بەردى.
سىردىڭ سارىنىن قارماقشى اۋدانىنان كەلگەن جىرشى-تەرمەشى كۇنسۇلۋ تۇرىكپەن جالعاستىردى.
بۇدان كەيىن كورەرمەندەر ماڭعىستاۋ ماقامىنا قۇلاق ءتۇردى. نارتاي جانە سۇگىر جىراۋلاردىڭ جىر-تەرمەلەرىن ناسيحاتتاپ جۇرگەن وسپان قۇلسىماق ۇزاقباي جىراۋدىڭ «ماجىلىستە ءسوز باستاۋ» تەرمەسىن توگىلتتى.
ال جەتىسۋ وڭىرىنەن كەلگەن شاتتىق ۋاتقان ءسۇيىنباي, جامبىل, كەنەندەر جولىن جالعاپ جۇرگەنىن كوپشىلىككە پاش ەتتى. باياناۋىلدىق ازامات بازارباي مايلىقوجانىڭ تەرمەسى «اتا-انانىڭ قادىرىن» ورىندادى.
ال قىتايدان تاريحي وتانىنا ورالعان قانداس باۋىرلارىمىز: اۋداندىق مادەنيەت ۇيىندە قىزمەت ەتىپ جۇرگەن رەسپۋبليكالىق ەسترادا-تسيرك كوللەدجىنىڭ تۇلەگى جالىن قۇنانباي, حالىقارالىق قازاق-تۇرىك ۋنيۆەرسيتەتىنىڭ تۇلەگى ەرباق قۇرمەتجان, قىتايداعى «كۇيتۇن» اقىندار ينستيتۋتىن بىتىرگەن بوكەن جىگەر اۋداندىق مادەنيەت بولىمىمەن بىرلەسە وتىرىپ وسى شارانى ۇيىمداستىرۋعا ۇلكەن ۇلەس قوستى.
– ۇلتتىڭ مادەنيەتى – ءداستۇرلى انىندە. ءان-جىرىمىز – قۇندىلىق. ءان اۋەلەسە –قازاقتىڭ رۋحى ويانادى, ساناسى اشىلادى. ويتكەنى ەلدىگىمىز, ورلىگىمىز, سالت-ءداستۇر, باسقا دا قۇندىلىقتار قۇدىرەتىن حالىق اندەرىنەن تاباسىز, – دەيدى ءداستۇرلى اندەردى ورىنداۋشى ەربول ايتباەۆ.
رۋحاني ءماندى شارادان سوڭ وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسى ونەر كورسەتكەن انشىلەردى اقشالاي, باعالى سىيلىقتارمەن ماراپاتتادى.
انشىلەر فەستيۆالىنە وبلىس اكىمدىگى, اقسۋ, ەكىباستۇز, شارباقتى, جەلەزين, تەرەڭكول, اققۋلى اۋداندارى اكىمدىكتەرى دەمەۋشىلىك كورسەتتى.
وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى ەرنۇر داۋەنوۆتىڭ ايتۋىنشا, ءبىزدىڭ وڭىرگە كەلىپ حالىق اندەرىن اۋەلەتكەن, تەرمە توگىلتىپ, جىردان شاشۋ شاشقان ءانشى-كۇيشى, تەرمەشىلەردىڭ بارلىعى دا ەلىمىزدەگى ءداستۇرلى ءان, جىر-تەرمە مەكتەپتەرىنىڭ قازىرگى تولقىنى. ماقسات – ۇلتتىق قازىنا حالىق اندەرىن, جىر-تەرمەلەرىن ناسيحاتتاۋ.
الداعى جىلى وبلىستىق مادەنيەت باسقارماسى ەستاي اتىنداعى ءداستۇرلى انشىلەر بايقاۋىن, رەسپۋبليكالىق اقىندار ايتىسىن, مايرا شامسۋتدينوۆا اتىنداعى ءان بايقاۋىن, «اقىن مەن ءانشى» سياقتى رۋحاني جوبالاردى جۇزەگە اسىرماق.
پاۆلودار وبلىسى,
ۋسپەن اۋدانى