«اقوردا» رەزيدەنتسياسىندا پرەمەر-ءمينيستردىڭ, پرەزيدەنت اكىمشىلىگى باسشىلىعىنىڭ, قاۋىپسىزدىك كەڭەسى حاتشىسىنىڭ, باس پروكۋروردىڭ, ۇلتتىق قاۋىپسىزدىك كوميتەتى توراعاسىنىڭ, ىشكى ىستەر, اقپارات جانە قوعامدىق دامۋ, دەنساۋلىق ساقتاۋ مينيسترلەرىنىڭ قاتىسۋىمەن الماتى اۋەجايى ماڭىنداعى جولاۋشىلار ۇشاعىنىڭ اپاتىنا بايلانىستى شۇعىل كەڭەس ءوتتى. بۇل تۋرالى اقوردانىڭ ءباسپاسوز قىزمەتى حابارلادى.
قاسىم-جومارت توقاەۆ قازاقستان حالقىنىڭ جانە جەكە ءوزىنىڭ اتىنان قازا بولعان ازاماتتاردىڭ وتباسىلارى مەن جاقىندارىنا كوڭىل ايتتى. جيىنعا قاتىسۋشىلار قايتىس بولعانداردى ءبىر مينۋت ۇنسىزدىكپەن ەسكە الدى.
مەملەكەت باسشىسى پرەمەر-مينيستر اسقار ءماميننىڭ, باس پروكۋرور عيزات نۇرداۋلەتوۆتىڭ, ىشكى ىستەر ءمينيسترى ەرلان تۇرعىمباەۆتىڭ جانە دەنساۋلىق ساقتاۋ ءمينيسترى ەلجان ءبىرتانوۆتىڭ ەسەپتەرىن تىڭدادى.
قاسىم-جومارت توقاەۆ ۇكىمەتكە الماتى قالاسى مەن الماتى وبلىسى اكىمدىكتەرىمەن بىرلەسىپ قازا بولعان ازاماتتاردىڭ وتباسىلارىنا 4 ميلليون تەڭگە كولەمىندە ماتەريالدىق كومەك كورسەتۋدى تاپسىردى. قايتىس بولعانداردىڭ جاقىندارىنا جان-جاقتى پسيحولوگيالىق جانە مەديتسينالىق قولداۋ كورسەتىلەدى. سونىمەن قاتار زارداپ شەككەندەردىڭ بارلىعىنا قاجەتتى كومەك بەرىلەدى.
28 جەلتوقساندى جالپىۇلتتىق ازا تۇتۋ كۇنى دەپ جاريالاعان پرەزيدەنت ەلىمىزدەگى مەملەكەتتىك تۋلاردى تومەن تۇسىرۋگە جانە بارلىق ويىن-ساۋىق شارالارىن توقتاتۋعا تاپسىرما بەردى.
مەملەكەت باسشىسى كەڭەس بارىسىندا:
–ۇشاق اپاتىنا سوقتىرعان سەبەپتەردى ساپالى ءارى وبەكتيۆتى تۇردە تەكسەرۋگە;
–«قازاقستاننىڭ اۆياتسيالىق اكىمشىلىگى» اكتسيونەرلىك قوعامىن بىلىكتى ماماندارمەن قامتۋ جۇمىستارىن تولىق اياقتاۋ شارالارىن قابىلداۋعا;
–قاۋىپسىزدىك تالاپتارىنا سايكەستەندىرۋ ءۇشىن بارلىق اۋە كومپانيالارىنىڭ جۇمىستارى مەن اۆياتسيالىق ينفراقۇرىلىم نىساندارىن تەكسەرۋگە تاپسىرما بەردى.
باس پروكۋراتۋرا مەن ىشكى ىستەر مينيسترلىگىنە قوزعالعان قىلمىستىق ءىس اياسىندا ۇشاق اپاتىنا سوقتىرعان سەبەپتەردى انىقتاۋ, كىنالىلەردى زاڭعا سايكەس جاۋاپكەرشىلىككە تارتۋ, سونداي-اق الماتى اۋەجايىنىڭ اۋماعىنا جاقىن ورنالاسقان جەكە قۇرىلىستاردىڭ زاڭدىلىعىن زەرتتەۋ جونىندە شارا قابىلداۋدى تاپسىردى.