وبلىس ورتالىعىندا مۇمكىندىگى شەكتەۋلى ازاماتتاردى بۇگىنگى زاماننىڭ تىڭ تەحنولوگيالارىن پايدالانا وتىرىپ, جاڭا ماماندىقتارعا باۋلۋ ماقساتىندا تەگىن وقىتۋ قولعا الىنباق. الەۋمەتتىك جوبانىڭ اۆتورى «IndiGo» وقىتۋ ورتالىعى. وقىتۋ سەمينارىنا جازىلۋ باستالىپ كەتتى. سەمينار 2020 جىلدىڭ قاڭتارىندا باستاۋ الادى دەپ جوسپارلانىپ وتىر.
«شەكسىز جۇمىس» الەۋمەتتىك جوباسى اياسىندا مۇمكىندىگى شەكتەۋلى ازاماتتارعا بۇگىنگى تاڭدا سۇرانىسقا يە smm-ماركەتولوگ, گرافيكالىق ديزاينەر, كوپيرايتينگ جانە web-ديزاينەر سياقتى ماماندىقتاردى تەگىن مەڭگەرۋدى ۇسىنىپ وتىر. الەۋمەتتىك جوبا اۆتورلارى «IndiGo» وقىتۋ ورتالىعىنىڭ نەگىزىن قالاۋشىلار ابىلاي يسين مەن شىڭعىس ءجۇسىپوۆ. بەلسەندى جاستار بۇگىندە قالانىڭ بىرقاتار كاسىپورىن باسشىلارىمەن كەلىسسوزدەر جۇرگىزىپ تە ۇلگەرگەن.
– وقىتۋ جاڭا جىلدىڭ قاڭتارىنان باستاۋ الادى دەپ وتىرمىز. بىرنەشە ادام سەمينارعا جازىلىپ تا قويدى. كۋرستان وتۋشىلەر ءۇشىن وقىتۋ تەگىن جۇرگىزىلەدى. ياعني, كاسىپورىندار قىزىعۋشىلىق تانىتىپ وتىرعاندىقتان, ماماندار ءۇشىن وقۋ اقىسىن وزدەرى تولەيدى. ويتكەنى, بۇگىنگى تاڭدا كوكشەتاۋدا سمم-ماركەتولوگتار, ۆەب-ديزاينەرلەر قاجەت كاسىپورىندار بارشىلىق. سوندىقتان ءبىلىم الام دەۋشىلەر بولسا, ەسىگىمىز اشىق. كەيىن ولار سول كاسىپورىنعا جۇمىسقا تۇرا الادى نەمەسە وسى باعىتتا جەكە دارا ەڭبەكتەنۋىنە دە بولادى, – دەيدى «ينديگو» وقىتۋ ورتالىعىنىڭ مەنەدجەرى شىڭعىس ءجۇسىپوۆ.
ياعني, ارنايى وقۋدان وتكەن ازاماتتار جۇمىسپەن دە قامتىلادى. جاڭا ماماندىق يەلەرىنىڭ جۇمىستان باس تارتۋلارىنا دا بولادى. سەبەبى, «IndiGo» وقىتۋ ورتالىعى ول ءۇشىن ءوز قىزمەتتەرىن كەپىلدىككە قويعان. ايتا كەتەيىك, بۇگىندە ورتالىق ۇبت-عا دايىندىق, شەت تىلدەرىن ۇيرەتۋمەن قاتار smm-ماركەتينگ, گرافيكالىق ديزاين, كوپيرايتينگ جانە web-ديزاين باعىتىندا قىزمەتتەر كورسەتۋمەن اينالىسادى. الەۋمەتتىك جوبانىڭ تانىستىرىلىمىنا قاتىسۋشىلاردىڭ وقۋعا دەگەن قىزىعۋشىلىقتارى جوق ەمەس. سەبەبى, بۇگىندە مۇمكىندىگى شەكتەۋلى ازاماتتارعا وزدەرىنە ىڭعايلى, ءارى جاندارىنا جاقىن كەلەتىن جۇمىس تابۋ قيىن.
– جوبا ماعان قاتتى ۇناپ وتىر. بۇل اسىرەسە, جاستار ءۇشىن وتە قاجەت دەپ ويلايمىن. ويتكەنى, جاڭا باعىتتا وزدەرىن دامىتا الادى. مۇمكىن كەيبىرەۋلەرى ىشتەي بۇل ماماندىقتاردى يگەرۋدى ارمانداپ تا جۇرگەن بولار. ەندى مىنە, وسىنداي مۇمكىندىك بەرىلىپ وتىر. تەگىن وقىتىلادى. ءبىزدىڭ ەلىمىزدە,, قالامىزدا مۇمكىندىگى شەكتەۋلى جاندار ءۇشىن وسىنداي جوبالاردىڭ جۇزەگە اسىرىلىپ جاتقانى قانداي تاماشا,–دەيدى قالا تۇرعىنى بيجامال بەكمۇراتوۆا.
«IndiGo» وقىتۋ ورتالىعى «شەكسىز جۇمىس» جوباسى اياسىندا ناۋرىز ايىنا دەيىن 50 ادامدى, ال جىل سوڭىنا دەيىن 200 ادامدى وقىتۋدى جوسپارلاپ وتىر.