قازاقستاننىڭ قورعانىس ءمينيسترى شىمكەنت, ارىس گارنيزوندارى مەن تۇركىستان قالاسىنا جۇمىس ساپارىمەن كەلدى. بۇل تۋرالى قورعانىس مينيسترلىگىنىڭ ءباسپاسوز قىزمەتى حابارلادى.
ارىستاعى اسكەري بولىمدە بولعان توتەنشە جاعدايدىڭ سالدارىن جويۋ جونىندەگى جۇمىس, اتاپ ايتقاندا قارۋ-جاراق, اسكەري تەحنيكا جانە ينجەنەرلىك-ساپەرلىك باتالونىنىڭ جابدىقتارى: ساپەرلەردى زاقىمداۋدان قورعايتىن «دوسپەح» سونىمەن قاتار, «سوكول», «تەن» قورعاۋ كوستيۋمدەرى تەكسەرىلدى.
اسكەري ءبولىم كومانديرىنىڭ مىندەتىن ۋاقىتشا اتقارۋشى – شتاب باستىعى پولكوۆنيك تەمىربەك ەرىمبەتوۆ ۇيىمداستىرىلعان جۇمىس, جۇمسالىپ جاتقان كۇش پەن قۇرال, ورىندالعان جانە جوسپارلانعان ءىس-شارالار جونىندە باياندادى. ءدال سول كۇنى ونى قورعانىس ءمينيستردىڭ بۇيرىعىمەن تاعايىنداعان اسكەري ءبولىمنىڭ كومانديرى رەتىندە تانىستىردى.
مينيستر جەكە قۇرامدى باتالون رەتىندە قۇرىلعانىمەن قۇتتىقتاپ, قىزمەتتە تابىس, وقۋ-جاۋىنگەرلىك مىندەتتەردى ودان ءارى اتقارۋعا قاتىستى تىلەك ءبىلدىردى.
ودان باسقا, جارىلعىش قۇرالداردى زالالسىزداندىرۋ ماماندارىنىڭ دايىندىق بارىسى تەكسەرىلدى. وتكەن ايدا شەتەلدىك مامانداردىڭ ۇسىنىمدارىن ەسكەرە وتىرىپ, جارىلعىش زاتتاردى ىزدەۋ, تابۋ جانە جويۋ جۇمىستارى جونىندەگى كاسىبي مامانداردى دايىندايتىن ارنايى كۋرستار اشىلدى.
قازىرگى كەزدە ارىس ماڭىندا جەدەلدەتىلگەن توپ جۇمىسىن جالعاستىرىلىپ, وق-دارىلەردى باسقا قويمالارعا جەتكىزۋ جۇمىسى ورىندالۋدا. جالپى بارلىق كەزەڭ بويىنشا اسكەري ماماندار قويمادان 1250 ش.م. استام اۋماققا وق-دارىلەردىڭ قالدىقتارىن ىزدەۋ مەن جيناۋ جۇرگىزىلدى. سۇڭگۋىر توپ 30 شاقىرىمعا جۋىق جەرگىلىكتى وزەننىڭ ارناسىن تازارتتى. اسكەري قالاشىقتا 13 تۇرعىن ءۇي, اكىمشىلىك-قازارمالىق اۋماقتا 16 عيمارات قايتا قالپىنا كەلتىرىلىپ, ارىس-شاردارا جولىنىڭ 7 شاقىرىمىنا جوندەۋ جۇمىسى جۇرگىزىلدى.
قىزمەتتىك ءىسساپار بارىسىندا اۋە شابۋىلىنا قارسى بريگادا وقۋ-جاتتىعۋ دابىلى بويىنشا قاۋىرت كوتەرىلدى. كەزەكشى كۇشتەر مەن قۇرالدار شارتتى قارسىلاستى انىقتاۋ مەن ونى جويۋ جونىندەگى وقۋ-جاۋىنگەرلىك ماقساتىن تولىقتاي ورىندادى. قورىتىندى رەتىندە اسكەرلەردى جاۋىنگەرلىك ازىرلىكتى ودان ءارى دامىتۋ جونىندە نۇسقاۋلار بەرىلدى.
تۇركىستان قالاسىنا ساپار بارىسىندا وبلىستىق قورعانىس ىستەرى جونىندەگى دەپارتامەنتى جانە «تۇركىستان» اۋەجايىنداعى اسكەري سەكتورىنا قاتىستى اكىمشىلىك عيماراتتارىنىڭ جوبالارى تانىستىرىلدى. ولاردى تاپسىرۋ مەرزىمدەرى 2023 پەن 2024 جىلداردىڭ تامىز ايلارىنا جوسپارلانعان.