تاۋەلسىزدىك سارايىندا قاسىم-جومارت توقاەۆتىڭ توراعالىعىمەن ۇلتتىق قوعامدىق سەنىم كەڭەسىنىڭ ەكىنشى وتىرىسى ءوتىپ جاتىر.
جيىندا ءسوز العان پرەزيدەنت كەڭەسشىسى ەرلان قارين العاشقى ۇلتتىق قوعامدىق كەڭەس وتىرىسىنان كەيىنگى ارالىقتا ورىندالعان جۇمىستار جايىندا ايتتى.
- ەڭ الدىمەن ۇلتتىق قوعامدىق كەڭەس مۇشەلەرىنىڭ بارلىق ايتىلعان ۇسىنىستارى جيناقتالدى. جوسپارعا ەنگىزىلدى. وسى ۋاقىت ارالىعىندا بەلسەندى تۇردە جۇمىس اتقارىلدى. اتاپ ايتقاندا, نەگىزگى جۇمىس 3 باعىتتا ۇيىمداستىرىلدى. بىرىنشىدەن, پرەزيدەنت اكىمشىلىگىنىڭ باسشىسى, پرەزيدەنت اكىمشىلىگى باسشىسىنىڭ ورىنباسارى دەڭگەيىندە جانە پرەمەر-ءمينيستردىڭ ورىنباسارى دەڭگەيىندە جۇمىس جينالىستارى ءوتتى. ول جينالىستاردا ۇلتتىق قوعامدىق كەڭەس مۇشەلەرى مۇددەلى مەملەكەتتىك ورگاندارىنىڭ وكىلدەرى قاتىسىپ, قاجەتتى ەكونوميكالىق جانە الەۋمەتتىك, مادەني سالالاردا ۇسىنىلعان رەفورمالار اياسىنداعى جەكەلەگەن سۇراقتاردى قارادى. بەرىلگەن مەرزىم شەگىندە جالپى جوعارى دەڭگەيدە اقوردا مەن ۇكىمەت ۇيىندە 18 جۇمىس جينالىسى مەن ءتۇرلى تالقىلاۋلار ۇيىمداستىرىلدى, - دەدى ەرلان قارين.
كەڭەستىڭ نەگىزگى ماقساتى – جۇرتشىلىقتىڭ, ساياسي پارتيالاردىڭ, ازاماتتىق قوعام وكىلدەرىنىڭ قاتىسۋىمەن مەملەكەتتىك ساياساتقا قاتىستى وزەكتى, ماڭىزدى ماسەلەلەر بويىنشا باستامالاردى, ۇسىنىستاردى تۇجىرىمداۋ. ال مەملەكەتتىك باعدارلامالار مەن نورماتيۆتىك-قۇقىقتىق اكتىلەردىڭ جوبالارىنا قوعامدىق ساراپتاما جۇرگىزۋ, ازاماتتىق قوعامنىڭ پىكىرىن ەسكەرە وتىرىپ ماڭىزدى ستراتەگيالىق پروبلەمالاردى قاراۋ, سىندارلى ديالوگتى قامتاماسىز ەتۋ – كەڭەستىڭ نەگىزگى مىندەتتەرى.
شاراعا كەڭەس مۇشەلەرى مەن باق وكىلدەرى قاتىسىپ جاتىر.