ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قويناۋىن پايدالانۋ, گاز جانە گازبەن جابدىقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
زاڭ جوباسى گاز جانە گازبەن جابدىقتاۋ سالاسىنداعى زاڭنامانى ودان ءارى جەتىلدىرۋ, ەلىمىزدىڭ گازعا دەگەن ىشكى سۇرانىسىن تۇراقتى قامتاماسىز ەتۋ ءۇشىن شارتتاردى ىنتالاندىرۋ, گازدى شيكىزات رەتىندە قولداناتىن جاڭا ينۆەستيتسيالىق جوبالاردى تارتۋ جانە ىسكە اسىرۋ ماقساتىندا ازىرلەندى.
قۇجاتپەن بىرقاتار زاڭ جوبالارىنا وزگەرىستەر مەن تولىقتىرۋلار ەنگىزىلەدى.
زاڭ جوباسىمەن جەر قويناۋىن كومىرسۋتەگىلەر بويىنشا پايدالانۋ قۇىعىن بەرۋگە اۋكتسيون وتكىزۋ تەتىكتەرىنە وزگەرىستەر ەنگىزىلەدى. زاڭ جوباسى قابىلدانعان سوڭ اۋكتسيوندى كوميسسيا ەمەس, وپەراتور ەلەكتروندىق نىساندا وتكىزەدى. بۇل رەتتە اۋكتسيون جەڭىمپازىن تانۋ جانە وعان كومىرسۋتەگىلەر بويىنشا جەر قويناۋىن پايدالانۋ قۇقىعىن بەرۋ فۋنكتسياسى كوميسسيادا ساقتالادى. سونداي-اق كومىرسۋتەگىلەر بويىنشا جەر قويناۋىن پايدالانۋ قۇقىعىن بەرۋگە ارنالعان ەلەكتروندىق اۋكتسيوندار وپەراتورىنىڭ قىزمەتى رەتتەلەدى.
ەلىمىزدىڭ ىشكى نارىعىن تۇراقتى گازبەن جابدىقتاۋدى, سونداي-اق گاز باعاسىنىڭ دەڭگەيىن قامتاماسىز ەتۋ ءۇشىن زاڭ جوباسى قابىلدانعان سوڭ ەلەكتر ەنەرگياسى وندىرىسىنە وتىن رەتىندە تاۋارلىق گازدى پايدالاناتىن جاڭا ستراتەگيالىق ماڭىزدى ينۆەستيتسيالىق جوبالار مەن جاڭادان ىسكە قوسىلعان ەلەكتر ستانتسيالارى ءۇشىن تاۋارلىق گازعا شەكتى باعا گاز جەتكىزۋدىڭ وزىندىك قۇنىنان جانە جەتى پايىزدى قۇرايتىن ۇلتتىق وپەراتوردىڭ رەنتابەلدىلىگىنىڭ ەڭ تومەن نورماسىنان قالىپتاستىرىلاتىن بولادى.
سونىمەن قاتار زاڭ جوباسىمەن تابيعي گازدىڭ وتىنى رەتىندە پايدالانىلۋىن كەڭەيتۋگە جانە تيىمدىلىگىن ارتتىرۋعا باعىتتالعان ەرەجەلەر ەنگىزىلەدى.
زاڭ جوباسىمەن ۋاكىلەتتى ورگانداردىڭ مۇناي-حيميا ونىمدەرىن ءوندىرۋ جونىندەگى ينۆەستيتسيالىق جوبالاردىڭ تىزبەسىن, سونداي-اق ونەركاسىپتىك تۇتىنۋشى-ينۆەستورلار مەن ەلەكتر ستانتسيالارىنىڭ تىزبەسىنە ەنگىزىلگەن تۇتىنۋشىلار ءۇشىن تاۋارلىق گازدى ىشكى نارىقتا كوتەرمە ساۋدادا وتكىزۋدىڭ شەكتى باعالارىن بەكىتۋ جانە باسقالارى جونىندەگى قۇزىرەتتەرى تولىقتىرىلادى.