بەيسەنبى كۇنى ەۋروپا ليگاسىنىڭ ەكىنشى ىرىكتەۋ كەزەڭىنىڭ ەكىنشى ويىنىندا «اقتوبە» ءوز الاڭىندا نورۆەگيانىڭ «حەدد» كلۋبىن 2:0 ەتىپ ۇتىپ, كەلەسى اينالىمعا شىقتى.
بۇل ماتچ «اقتوبەنىڭ» ەۋروپا ليگاسىنىڭ ىرىكتەۋ كەزەڭدەرىندەگى باسقا ويىندارى سياقتى اسا تارتىستى ءوتتى. «اقتوبە» سالعان بەتتەن شابۋىلعا شىعىپ, جىلدام گول سوعىپ الدى. گولدى سەرگەي داۆىدوۆ سوقتى. ەكىنشى تايمدا دا الاڭ يەلەرى بىرنەشە رەت قاۋىرت شابۋىلعا شىعىپ, ەسەپتى ەسەلەۋگە مۇمكىندىكتەر الدى. سونداي ساتتەردىڭ بىرىندە داۆىدوۆ تاعى ءبىر گول سوعىپ, ەسەپتى 2:0-گە جەتكىزدى. «حەدد» ويىنشىلارى بولسا, قارىمتا شابۋىل ۇيىمداستىرۋعا تىرىسىپ, الىستان بىرنەشە قاۋىپتى سوققىلار جاساپ تۇردى. بۇل كەلەسى كەزەڭگە شىعۋ ءۇشىن ماتچتا نورۆەگتەر ءوز الاڭىنداعى جەڭىستەرىنە وراي, قارسىلاسىنىڭ قاقپاسىنا ءبىر عانا دوپ سوعۋ قاجەت ەدى. بىراق, الاڭ يەلەرى ولارعا مۇنداي مۇمكىندىكتى بەرگەن جوق.
ەندى «اقتوبە» ءۇشىنشى كەزەڭدە يسلانديا چەمپيوناتىنىڭ كۇمىس جۇلدەگەرى «برەيدابليك» كومانداسىمەن كەزدەسەدى. ءبىرىنشى ويىن 1 تامىز كۇنى اقتوبەدە, ەكىنشى ماتچ 8 تامىزدا كوۋپاۆوگيۋر قالاسىندا وتەدى. ەگەر اقتوبەلىكتەر بۇل كوماندانى دا جەڭسە, ەۋروپا ليگاسىنىڭ توپتىق تۋرنيرىنە توپ ەتە تۇسەدى. ال وسى كۇنى ەۋروپا ليگاسىنىڭ ەكىنشى ىرىكتەۋ كەزەڭىندە ويناعان تاعى ءبىر كوماندامىز پاۆلوداردىڭ «ەرتىسى» بوسنيا جانە گەرتسوگوۆينادا «شيروكي بريەگ» كلۋبىنان 0:2 ەسەبىمەن ۇتىلىپ قالدى.
ءسويتىپ, ءبىزدىڭ ەلدەن «شاحتەر» مەن «اقتوبە» عانا چەمپيوندار ليگاسى مەن ەۋروپا ليگاسىنىڭ ءۇشىنشى كەزەڭىنە شىقتى. ەكەۋىنىڭ دە توپتىق تۋرنيرگە شىعۋعا مۇمكىندىگى بار. ەڭ باستىسى, ولارعا سوڭعى ويىندارىنداعىداي بار كۇش-جىگەرىن سالىپ, ويناسا الىنبايتىن قامال بولمايدى دەپ ويلايمىز.
بيىلعى چەمپيوندار ليگاسىنىڭ ىرىكتەۋ كەزەڭدەرىنە 47 ەل قاتىسىپ جاتسا, ولاردىڭ ىشىندە قازاقستان ازىرشە ەكىنشى ورىندا كەلەدى. «شاحتەر» مەن «اقتوبە» ءبىزدىڭ ەلگە تاعى ۇپاي قوستى. ءبىرىنشى ورىندى ءالى كوماندالارى جەڭىلمەگەن يسلانديا يەلەنىپ وتىر.
داستان كەنجالين,
«ەگەمەن قازاقستان».