سىرتقى ىستەر ءمينيسترى مەملەكەت باسشىسىنا اقش-قا جاساعان رەسمي ساپارىنىڭ نەگىزگى ناتيجەلەرى مەن بيىلعى 15-16 جەلتوقساندا مادريدتە وتكەن «ازيا-ەۋروپا» سىرتقى ىستەر مينيسترلەرى فورۋمىنىڭ 14-كەڭەسىنە قاتىسقانى جونىندە باياندادى. بۇل تۋرالى اقوردانىڭ ءباسپاسوز قىزمەتى حابارلادى.
مۇحتار تىلەۋبەردىنىڭ ايتۋىنشا, كەلىسسوز بارىسىندا اقش-تىڭ مەملەكەتتىك حاتشىسى مايك پومپەو امەريكا قۇراما شتاتتارىنىڭ قازاقستاندى وڭىردەگى سەنىمدى سەرىكتەسى ءارى وڭىرلىك قاۋىپسىزدىكتى قامتاماسىز ەتۋ ىسىندەگى نەگىزگى ارىپتەسى سانايتىنىن ايتتى.
«ازيا-ەۋروپا» فورۋمىنىڭ قاتىسۋشىلارى ازيا مەن ەۋروپا ەلدەرىن بايلانىستىراتىن جانە كولىك جولدارىن دامىتۋعا ىقپال ەتەتىن قازاقستاننىڭ ترانزيتتىك الەۋەتىن جوعارى باعالادى.
2020 جىلعا ارنالعان حالىقارالىق كۇن ءتارتىبىن تالقىلاۋ بارىسىندا قاسىم-جومارت توقاەۆ قازاقستان رەسپۋبليكاسىنىڭ سىرتقى ساياساتىنداعى باسىم باعىتتار جونىندە بىرقاتار ناقتى تاپسىرما بەردى.