تۋنيستە قر ءسىم ەرەكشە تاپسىرمالار جونىندەگى ەلشىسى قايرات لاما شاريف يسلام ۇيىمىنىڭ ءبىلىم, عىلىم جانە مادەنيەت جونىندەگى (ISESCO) باس ديرەكتورى دوكتور ساليم بەن مۋحاممەد ال-ماليكپەن كەزدەسۋ وتكىزدى. بۇل تۋرالى ءسىم ءباسپاسوز قىزمەتى حابارلادى.
قازاقستان ISESCO-مەن ىنتىماقتاستىققا ۇلكەن ءمان بەرەدى. كوپتەگەن جىلدار بويى ءبىزدىڭ ەلىمىز وسى بەدەلدى ۇيىممەن جەمىستى, سەرپىندى قارىم-قاتىناستاردى قولداپ, مادەني مۇرا ەسكەرتكىشتەرىن ساقتاۋ جانە قالپىنا كەلتىرۋ, يسلام الەمى ەلدەرىنىڭ تىلدەرىن, تاريحى مەن مادەنيەتىن زەردەلەۋ جانە وقىتۋ سالاسىندا تاجىريبە الماسۋ سياقتى ۇلتتىق جوبالاردى تابىستى ىسكە اسىرۋعا مۇمكىندىك بەرەدى.
الداعى 2020 جىلى شىعىستىڭ ۇلى ويشىلى ءابۋ ناسىر ءال-ءفارابيدىڭ 1150 جىلدىق مەرەيتويى بولاتىنى اتالىپ ءوتىلدى. ونىڭ مەرەيتويىن دايىنداۋ جانە وتكىزۋ جونىندەگى قازاقستاندىق جوسپار ۇلى فيلوسوفتىڭ مۇراسىن زەردەلەۋگە باعىتتالعان 50-دەن استام ءىس-شارانى قامتيدى.
تاراپتار ISESCO قامقورلىعىمەن يراكتاعى ءال-ءفارابيدىڭ 1150-جىلدىق مەرەيتويىنا ارنالعان حالىقارالىق عىلىمي-تاجىريبەلىك كونفەرەنتسياسىن وتكىزۋگە كەلىستى. بۇل فورۋمعا مۇسىلمان ەلدەرىنىڭ فارابيستتەرى شاقىرىلادى.
سونداي-اق ISESCO مۇشە ەلدەردە ءال-فارابي مۇراسىن زەرتتەۋ بويىنشا حالىقارالىق ورتالىقتار جەلىسىن قۇرۋ ماسەلەسى قاراستىرىلدى.
قازىرگى ۋاقىتتا وتىرار, اممان, كاير, ىستامبۇل جانە داماسك قالالارىندا ءال-فارابي اتىنداعى عىلىمي-ءبىلىم بەرۋ ورتالىقتارى مەن مۇراجاي-ۇيلەرى بار.