ەلوردالىق پوليتسيا دەپارتامەنتى تجد-مەن بىرگە 2019 جىلدىڭ 17 جەلتوقسانىنان 2020 جىلدىڭ 3 قاڭتارىنا دەيىن قالا اۋماعىندا «پيروتەحنيكا-2019» جەدەل الدىن الۋ ءىس-شاراسىن وتكىزەدى. بۇل تۋرالى ەلوردا اكىمدىگىنىڭ رەسمي سايتى حابارلادى.
ءىس-شارانىڭ نەگىزگى ماقساتى – ارنايى سەرتيفيكاتى جوق پيروتەحنيكالىق ونىمدەردى اينالىمنان الىپ تاستاۋ, سونداي-اق زاڭسىز ساتۋ جانە ساقتاۋ ەرەجەلەرىن بۇزۋ فاكتىلەرىن انىقتاپ, ونىڭ جولىن كەسۋ.
پوليتسيا دەپارتامەنتى پيروتەحنيكالىق بۇيىمداردى كونتەينەرلەردەن تىس جانە پيروتەحنيكالىق بۇيىمداردى ساقتاۋعا ليتسەنزياسى, رۇقساتى جوق ادامدارداردىڭ ساتۋىنا, سونداي-اق اشىق سورەلەردە, اۆتوماشينالاردا, شاتىرلاردا, وتپە جولداردا قولما-قول ساتۋعا قاتاڭ تىيىم سالىناتىندىعىن ەسكەرتەدى. وسىنداي فاكتىلەر انىقتالعان جاعدايدا, اتالعان تۇلعالار اكىمشىلىك جاۋاپكەرشىلىككە تارتىلاتىن بولادى.