پارلامەنت ءماجىلىسىنىڭ دەپۋتاتتارى پلەنارلىق وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەڭبەك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قاراپ, ونى ءبىرىنشى وقىلىمدا ماقۇلدادى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلادى.
زاڭناماعا ەنگىزىلەتىن تۇزەتۋلەردى حالىق قالاۋلىلارىنا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ تانىستىردى. ول ءوز سوزىندە بۇل زاڭ جوباسى ەڭبەك قاتىناستارىن, الەۋمەتتىك سەرىكتەستىك, قاۋىپسىزدىك جانە ەڭبەكتى قورعاۋ ماسەلەلەرىن قوزعايتىنىن اتاپ ءوتتى.
«ەڭبەك جاعدايلارى بويىنشا قىزمەتكەرلەردى كەمسىتۋ فاكتىلەرىنە جول بەرمەۋ ماقساتىندا: ەڭبەك كودەكسىندە قىزمەتكەردىڭ لايىقتى ەڭبەك جانە تۇرمىس جاعدايلارىنا قۇقىعى تۋرالى نورمانى بەلگىلەۋ, ەڭبەك سالاسىندا كەمسىتۋشىلىك فاكتىلەرىنە جول بەرگەنى ءۇشىن جۇمىس بەرۋشىلەردى جاۋاپكەرشىلىككە تارتۋ ءۇشىن اكىمشىلىك زاڭناماعا نەگىز ەنگىزۋ ۇسىنىلادى», دەپ حابارلادى ءبىرجان نۇرىمبەتوۆ.
ماسەلەن, كادرلىق ءىس جۇرگىزۋدى تسيفرلاندىرۋ ماقساتىندا جۇمىس بەرۋشىنىڭ ەڭبەك شارتىندا كوزدەلگەن جۇمىسكەردىڭ ەڭبەك قىزمەتى تۋرالى اقپاراتتى ەڭبەك شارتتارىن ەسەپكە الۋدىڭ بىرىڭعاي جۇيەسىنە (بۇدان ءارى – ەقابج) بەرۋدى كوزدەۋ ۇسىنىلادى. قازىرگى ۋاقىتتا ەڭبەكمينى پيلوتتىق جوبا ىسكە اسىرۋدا, ونىڭ شەڭبەرىندە 23 762 ۇيىم جاساعان 1 ملن 220 مىڭ ەڭبەك شارتتارى تۋرالى مالىمەتتەرىن سوتقا ەنگىزدى.
بۇدان باسقا, جۇمىس بەرۋشىنىڭ مەرزىمدى اسكەري قىزمەت وتكەرۋ كەزەڭىندە جۇمىس ورنىن ساقتاپ قالۋ مىندەتىن ولارعا جالاقىسى ساقتالمايتىن دەمالىس بەرۋ جولىمەن بەكىتۋ ۇسىنىلادى. بۇل رەتتە قىزمەتكەردىڭ اسكەري ءبولىم تىزىمىنەن شىعارىلعان كۇننەن باستاپ ءبىر اي ىشىندە ءوزىنىڭ ەڭبەك فۋنكتسيالارىنا كىرىسۋ مىندەتى بەكىتىلەدى.
- وتباسىنىڭ ناۋقاس مۇشەسىنە كۇتىم جاسايتىن جۇمىسكەرلەرگە تولىق ەمەس جۇمىس ۋاقىتى رەجيمىنە قۇقىق بەرۋ ۇسىنىلادى. بۇل شارا قىزمەتكەرلەرگە ەڭبەك قىزمەتىن جەكە جانە وتباسىلىق قاجەتتىلىكتەر مەن مىندەتتەرمەن ۇيلەستىرۋگە مۇمكىندىك بەرەدى, – دەپ تولىقتىردى مينيستر.
سونداي-اق زاڭ جوباسىندا كومپانيالاردىڭ ءبىر توبى شەڭبەرىندە, ياعني ءبىر قۇرىلتايشىلارى, قاتىسۋشىلارى نەمەسە اكتسيونەرلەرى بار زاڭدى تۇلعالار اراسىندا قىزمەتكەرلەردى ىسساپارعا جىبەرۋ مۇمكىندىكتەرىن كەڭەيتۋ كوزدەلەدى.
كەلىسسوزدەر جۇرگىزۋ جانە ۇجىمدىق شارتتارعا قول قويۋ بارىسىندا بارلىق جۇمىسكەرلەردىڭ پىكىرىن ەسكەرۋ ماقساتىندا كاسىپوداق مۇشەلەرى بولىپ تابىلمايتىن قىزمەتكەرلەردىڭ مۇددەلەرىن ءبىلدىرۋ بويىنشا سايلانبالى وكىلدەردىڭ وكىلەتتىكتەرىن بەكىتۋ جوسپارلانۋدا. بۇل رەتتە, زاڭناماعا وزگەرىستەر ەنگىزۋدى ناقتىلاۋ تۋرالى ۇيىمنىڭ جاسالۋى مۇمكىن تەك ءبىر عانا ۇجىمدىق شارت, ت. ب. بىرنەشە ۇجىمدىق شارتتاردىڭ ءبىر كاسىپورىندا اكەلەدى داۋلار قىزمەتكەرلەر مەن جۇمىس بەرۋشىلەر اراسىندا نەگىزدەگى ايىرماشىلىقتار, ولاردى ۇستاۋ.
«الەۋمەتتىك ارىپتەستىكتى رەتتەۋ سالاسىندا كاسىپوداقتاردىڭ قىزمەتىنە بايلانىستى حالىقارالىق ەڭبەك ۇيىمىنىڭ ۇسىنىمدارىن ورىنداۋ ماقساتىندا: كاسىپوداقتاردىڭ جوعارى تۇرعان كاسىپوداق بىرلەستىكتەرىنە مىندەتتى مۇشەلىگىن الىپ تاستاۋ, بۇل كاسىپوداقتاردىڭ بىرلەستىك ەركىندىگىنە قۇقىعىن شەكتەمەۋگە مۇمكىندىك بەرەدى; كاسىپوداقتاردىڭ رەسپۋبليكالىق, سالالىق, وڭىرلىك بىرلەستىكتەرى رەتىندە ولاردىڭ مەملەكەتتىك تىركەلۋى كەزىندە كاسىپوداقتاردىڭ مارتەبەسىن راستاۋ ءۇشىن جاعدايلاردى وڭايلاتۋ ۇسىنىلادى. وسىعان بايلانىستى سالالىق كاسىپوداقتار ءۇشىن سالا جانە ونىمەن ارالاس سالالار قىزمەتكەرلەرىنىڭ جالپى سانىنىڭ كەمىندە جارتىسىن بىرىكتىرۋ تۋرالى تالاپ الىنىپ تاستالادى, 6 ايدان 1 جىلعا دەيىن ولاردى ادىلەت ورگاندارىندا تىركەۋ كەزىندە كاسىپوداقتار بىرلەستىگىنىڭ مارتەبەسىن راستاۋ مەرزىمدەرى ۇلعايادى», – دەدى ەڭبەكمينى باسشىسى.
سونداي-اق زاڭ جوباسىندا جۇمىس بەرۋشىلەرگە, جۇمىسكەرلەرگە جانە ەڭبەك جونىندەگى ۋاكىلەتتى ورگانعا ەڭبەكتى قورعاۋدى باسقارۋ جۇيەسىن ەنگىزۋ جانە ونىڭ جۇمىس ىستەۋى جونىندەگى تالاپتاردى بەكىتۋ كوزدەلەدى.
جۇمىس بەرۋشىلەردىڭ «ەڭبەكتى قورعاۋ» بىرىڭعاي اقپاراتتىق جۇيەسىن پايدالانا وتىرىپ, ەڭبەك جاعدايلارى بويىنشا وندىرىستىك وبەكتىلەردى اتتەستاتتاۋ ناتيجەلەرىن جانە جۇمىس بەرۋشىنىڭ قىزمەتكەرلەردىڭ ەڭبەك قۇقىقتارىن ساقتاۋ جونىندەگى قىزمەتىن دەكلاراتسيالاۋ ءۇشىن مالىمەتتەردى ەلەكتروندىق فورماتتا بەرۋ تەتىگىن ەنگىزۋ ۇسىنىلادى.
«بىرنەشە ۇيىم ءبىر ۋاقىتتا ءتۇرلى جۇمىس تۇرلەرىن جۇرگىزگەن جاعدايدا, باس مەردىگەرگە ەڭبەكتى قورعاۋ تالاپتارىنىڭ ساقتالۋىن جالپى ۇيلەستىرۋدى قاراستىرۋ ۇسىنىلادى. بۇل شارا وندىرىستەگى جازاتايىم وقيعالاردى بولدىرماۋ ماقساتىندا ەڭبەكتى قورعاۋ قىزمەتىنىڭ جۇمىسىن ۇيلەستىرۋگە مۇمكىندىك بەرەدى», – دەپ اتاپ ءوتتى ءبىرجان نۇرىمبەتوۆ.
جوبانى ىسكە اسىرۋ رەسپۋبليكالىق بيۋدجەتتەن قوسىمشا قارجى شىعىندارىن تالاپ ەتپەيدى جانە تەرىس الەۋمەتتىك-ەكونوميكالىق نەمەسە قۇقىقتىق سالدارعا اكەپ سوقپايدى.