«استانا» حالىقارالىق قارجى ورتالىعىندا (احقو) پرەمەر-مينيستر اسقار ءماميننىڭ توراعالىعىمەن ەۋرازيالىق دامۋ بانكى (ەدب) كەڭەسىنىڭ وتىرىسى ءوتتى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
شاراعا بانك اكتسيونەرلەرىنىڭ وكىلەتتى وكىلدەرى: ارمەنيادان – ۆيتسە-پرەمەر م. گريگوريان جانە قارجى ءمينيسترىنىڭ ورىنباسارى ا. ايراپەتيان, بەلارۋستەن – قارجى ءمينيسترى م. ەرمولوۆيچ جانە ەكونوميكا ءمينيسترى د. كرۋتوي, قىرعىزستاننان – قارجى ءمينيسترى ب. جەەنباەۆا جانە ەكونوميكا ءمينيسترى س. مۋكانبەتوۆ, رەسەيدەن – ۇكىمەت توراعاسىنىڭ ءبىرىنشى ورىنباسارى – قارجى ءمينيسترى ا. سيلۋانوۆ جانە قارجى ءمينيسترىنىڭ ورىنباسارى س. ستورچاك, تاجىكستاننان – قارجى ءمينيسترى ف. كاححورزودا جانە ەكونوميكالىق دامۋ جانە ساۋدا ءمينيسترى ز. زاۆكيزودا, قازاقستاننان – پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءا. سمايىلوۆ قاتىستى.
كەزدەسۋ الدىندا احقو اۋماعىندا بانك كەڭسەسىن اشۋ رەسمي ءراسىمى ءوتتى – ەدب «استانا» حالىقارالىق قارجى ورتالىعىندا ورنالاسقان العاشقى دامۋ بانكى بولدى.
«ەدب ەۋرازيالىق ەكونوميكالىق وداققا مۇشە مەملەكەتتەردىڭ ىنتىماقتاستىعىن دامىتۋعا جانە بىرلەسكەن جوبالاردى قارجىلاندىرۋعا قوماقتى ۇلەس قوسۋدا», — دەدى ا. مامين.
وتىرىستا ەۋرازيالىق دامۋ بانكىنىڭ 2019 جىلعى جۇمىس قورىتىندىسى تالقىلانىپ, 2020 جىلعا ارنالعان مىندەتتەر ايقىندالدى. كەڭەس ءىرى ينۆەستيتسيالىق جوبالاردى بەكىتۋ, تسيفرلىق باستامالاردى ىسكە اسىرۋ جانە بانك قاتىسۋشىلارىنىڭ قۇرامىن كەڭەيتۋ ماسەلەلەرىن قاراستىردى.
وسى جىلى 1 جەلتوقسانداعى جاعداي بويىنشا ەدب-نىڭ ينۆەستيتسيالىق قورجىنى $4 ملرد-تان استى, ءوسىمى 2018 جىلمەن سالىستىرعاندا 18% ($621 ملن) قۇرادى. بيىل 11 ايدا $1,2 ملرد جۋىق كولەمدى قامتيتىن 23 جاڭا ينۆەستيتسيالىق جوباعا قول قويىلدى, ولار ەنەرگەتيكا (27,9%), ينفراقۇرىلىم (22,4%), قارجى سەكتورى (15%) جانە باسقا دا سالالاردى قامتيدى. بانكتىڭ ينۆەستيتسيالىق قورجىنىنىڭ ەلدەر قۇرىلىمى بويىنشا رەسەيدەگى (42,8%) جانە قازاقستانداعى (42%) جوبالارى باسىم. ونىڭ 11,2% - بەلارۋسكە, 2,3% – ارمەنياعا, 1,6% – قىرعىزستانعا, 0,1% – تاجىكستانعا تيەسىلى.
بيىل ەدب قارجى ينستيتۋتتارىن – جەرگىلىكتى بانكتەردى ەسەپتىك قىزمەت كورسەتۋدى ىسكە قوستى, وسىلايشا, «بانكتەر ءۇشىن بانك» تۇجىرىمداماسىن جۇزەگە اسىردى, جانە جەرگىلىكتى بيرجالاردى قامتىدى. 1 جەلتوقسانداعى جاعداي بويىنشا 40 قارجى ينستيتۋتى ءۇشىن 134 ەسەپشوت اشىلدى.