استانادا اسكەري-تەحنيكالىق ىنتىماقتاستىق ماسەلەلەرى جونىندەگى قازاقستان-ۋكراينا بىرلەسكەن ۇكىمەتارالىق كوميسسياسىنىڭ 4-ءشى وتىرىسى بولىپ ءوتتى. كوميسسيا جۇمىسىنا قازاقستان رەسپۋبليكاسى قورعانىس ءمينيسترىنىڭ ورىنباسارى سەرگەي گروموۆ پەن ۋكراينا قورعانىس ءمينيسترىنىڭ ورىنباسارى الەكساندر ولەينيك باسشىلىق جاسادى.
وتىرىس بارىسىندا كوميسسياعا قاتىسۋشىلار ەكى ەل اراسىنداعى اسكەري-تەحنيكالىق ىنتىماقتاستىق جانە قورعانىس ونەركاسىبى كەشەندەرىنىڭ ءوزارا ءىس-قيمىلى ماسەلەلەرىن قاراستىردى. تاراپتار اسكەري تەحنيكانى جەتكىزۋ, جوندەۋ جانە جاڭعىرتۋ جونىندە پىكىر الماستى. سونداي-اق, قازاقستان اۋماعىندا قىزمەت كورسەتەتىن ورتالىقتار مەن بىرلەسكەن كاسىپورىندار قۇرۋ ماسەلەلەرى ءسوز بولدى.
كوميسسيا وتىرىسىندا اسكەري-تەڭىز كۇشتەرىنىڭ قۇرىلىسى سالاسىنداعى ىنتىماقتاستىققا ايتارلىقتاي ماڭىز بەرىلدى. سونداي-اق, تاراپتار قازاقستان مەن ۋكراينانىڭ اسكەري-عىلىمي جانە اسكەري وكىلدىكتەرى اراسىنداعى ىنتىماقتاستىقتىڭ بولاشاعىن تالقىلادى.
– كوميسسيا وتىرىس قارساڭىندا ەكى ەلدىڭ ساراپشىلارى مەن قورعانىس ونەركاسىبى كاسىپورىندارى وكىلدەرىنىڭ اراسىنداعى كەزدەسۋ جەمىستى ءوتتى, – دەدى قازاقستان قورعانىس ءمينيسترىنىڭ ورىنباسارى سەرگەي گروموۆ. – بۇگىنگى وتىرىس تا ەكىجاقتى ىنتىماقتاستىقتى ودان ءارى نىعايتا تۇسەتىنىنە سەنىمدىمىن.
اسكەري-تەحنيكالىق ىنتىماقتاستىق ماسەلەلەرى جونىندەگى قازاقستان-ۋكراينا ءبىرلەسكەن ۇكىمەتارالىق كوميسسياسى 4-ءشى وتىرىسىنىڭ قورىتىندىسى بويىنشا حاتتاماعا قول قويىلدى.
«ەگەمەن-اقپارات».