يراكتاعى تەرروريستىك ارەكەتكە قاتىستىلىعى ءۇشىن جازاسىن وتەپ جاتقان انالاردىڭ بالالارى وتكەن ايدىڭ اياعىندا مەملەكەت باسشىسى قاسىم-جومارت توقاەۆتىڭ تاپسىرماسىمەن گۋمانيتارلىق اكتسيا اياسىندا ەلگە قايتارىلعان ەدى. كوپ وتپەي ولار تۋىستارىنا تابىستالدى.
بۇل بالالار – ءبىرى تاعدىردىڭ توسىنىن, تالكەگىن قۇرساقتان «كورگەن», ەندى ءبىرى تۋا سالا تۋعان جەرىنەن جىراقتاعان, كەيبىرى ءتىپتى تۇرمەدە تۋىپ, بارىنەن بۇرىن اناسىنان تىرىدەي ايىرىلعان جانە اكەدەن حابارسىز قالعان بالدىرعاندار. شەشەسى سوتتالعانمەن, بالالاردىڭ ەش كىناسى جوق. سوندىقتان ولار تاۋەلسىز ەلىمىزدىڭ بەيبىت اسپانىندا كۇن كەشۋگە قۇقىلى. دەگەنمەن ءالى وڭ-سولىن تانىماعان بالا ءۇشىن اتا-انادان اسقان جاقىن جان جوق. اكە-شەشەنىڭ وزىندەي بولماسا دا, ورنىن تولتىراتىن اتا-اجەسى, اتا-اناسىنىڭ باۋىرلارى بالالاردى باۋىرىنا باستى. بىراق بالالار بىردەن بوي ۇيرەتە قويمادى.
ءوزىڭىز ويلاڭىزشى, اناسىنان ءبىر ايىرىلۋ, تاعى تانىمايتىن تۋىسى, ومىرىندە ءبىر رەت بولسىن كورمەگەن ادامعا ەرۋ تيتىمدەي جۇرەككە اۋىر سوققى بولاتىنى ءسوزسىز. مۇنداي سالماقتى جۇكتى ارقالاۋعا «جۋسان» وپەراتسياسىندا جۇمىس ىستەگەن ماماندار جۇمىلدىرىلعان. «بالالار العاشىندا بىزگە دە بىردەن اشىلىپ كەتكەن جوق. ءبىراز جۇمىس جۇرگىزدىك. 3-4 كۇننەن كەيىن عانا بىزدەن ۇرەيلەنبەيتىن, تارتىنبايتىن بولدى. سيريادان كەلگەن بالالاردان بۇل كىشكەنتايلاردىڭ ايىرماشىلىعى – اتا-اناسىز. بۇل – ۇلكەن اۋىرتپالىق. وعان قوسا بۇل بالالار سيريادان كەلگەندەردەي ەمەس قازاق, ورىس تىلدەرىن تۇسىنبەيدى, اراسىندا ازەربايجان, اراب, وزبەك تىلىندە سويلەيتىندەرى بار. وسىنداي ايىرماشىلىقتار كۇردەلى جۇمىستى قاجەت ەتتى», دەيدى پسيحولوگ ايبەك قىلىشبەك.
يراكتان ورالعان بالالار «بايتەرەك» مونۋمەنتىن كورۋگە قۇشتار بولعان ەكەن. ەلىمىزدىڭ سىرتقى ىستەر مينيسترلىگى مەن ءبىلىم جانە عىلىم مينيسترلىگى كىشكەنتايلاردىڭ ارمانىنا قانات ءبىتىردى. ال ومىرلىك قيىن جاعدايدا قالعان بالالاردى قولداۋ ورتالىعىنىڭ تاجىريبەلى ماماندارى يراكتان ورالعان كىشكەنتايلارعا جان-جاقتى پسيحولوگيالىق, مەديتسينالىق, پەداگوگيكالىق جانە الەۋمەتتىك كومەك كورسەتكەن. بارلىق ءتيىستى رەسىم جۇرگىزىلگەننەن كەيىن بالالاردىڭ ءبارى تۋىستارىنا تاپسىرىلدى. ايتا كەتەيىك, قاراشادا ەلگە ۇشىپ كەلگەن بالالاردى تۋىسقاندارى اۋەجايدا كۇتىپ العان بولاتىن.
ءبىر الاڭداتاتىنى, 14 بالانىڭ ىشىندە 4-ەۋىن تۋىستارى قابىلداۋدان باس تارتقان. «تۋىستارىنا تابىستالعاننان كەيىنگى بارلىق جۇمىس جەرگىلىكتى اتقارۋشى ورگانداردىڭ باقىلاۋى بويىنشا, ءبىلىم بەرۋ ۇيىمدارى, ارنايى قولداۋ ورتالىقتارىنىڭ كومەگىمەن جۇرگىزىلەدى. بۇگىن بايقاعانىڭىزداي, تۋىستارى تۇراتىن وبلىستاردىڭ ءبىلىم باسقارمالارىنان ارنايى ماماندار دا جۇمىستىڭ باسى-قاسىندا ءجۇر. ال تۋىستارى قابىلداۋدان باس تارتقان بالالار وتباسى ۇلگىسىندەگى بالالار ۇيىندە تاربيەلەنەدى», دەدى ءبىلىم جانە عىلىم ءمينيسترىنىڭ كەڭەسشىسى رايسا شەر.