كەنشىلەر استاناسىنداعى Good Zone كوۆوركينگ ورتالىعىندا جاس مەملەكەتتىك قىزمەتشىلەر مەكتەبىنىڭ تۇلەكتەرىنە ديپلوم تاپسىرۋ سالتاناتى ءوتتى.
ولاردى مەملەكەتتىك قىزمەت ىستەرى اگەنتتىگىنىڭ قاراعاندى وبلىسى بويىنشا دەپارتامەنتىنىڭ باسشىسى ايگۇل بايحانوۆا مەن قاراعاندى وبلىستىق جاستار ساياساتى ماسەلەلەرى جونىندەگى باسقارمانىڭ باسشىسى نۇرجان جەتپىسباەۆ قۇتتىقتادى.
ءوڭىر جاستارىنىڭ جەتەكشىسى نۇرجان جەتپىسباەۆ اتالعان جوبانىڭ جاستار اراسىندا مەملەكەتتىك قىزمەتتى ناسيحاتتاۋعا كومەكتەسەتىنىن اتاپ ءوتتى.
– قاراعاندىدا جاس مەملەكەتتىك قىزمەتشىلەر مەكتەبى 12 جىلدان بەرى جۇمىس ىستەپ كەلەدى. اتالعان جوبا ستۋدەنتتەردىڭ ەڭ تالانتتى جانە بولاشاعى بار وكىلدەرىنە سەنىم ارتادى. مەكتەپ جۇمىس ىستەگەن ۋاقىت ارالىعىندا 300-دەن استام وقۋشى سىناقتان ءساتتى ءوتتى. قازىرگى تاڭدا ونىڭ 85-ءى مەملەكەتتىك قىزمەتتە جۇمىس ىستەپ ءجۇر, – دەيدى ول.
بيىل ديپلوم العان 27 تۇلەك «ەكونوميكانى مەملەكەتتىك رەتتەۋ», «قۇقىقتىق رەتتەۋ», «قوعاممەن بايلانىس» جانە «كاسىپكەرلىك نەگىزدەرى» باعىتتارى بويىنشا تاعىلىمدامادان ءوتتى.
قاراعاندى وبلىسى