باس پروكۋروردىڭ ورىنباسارى قازاقستاندىقتارعا ۇندەۋ جاريالادى. مالىمدەمەنىڭ ءماتىنى باس پروكۋراتۋرا سايتىندا جاريالاندى.
"باس پروكۋراتۋرانىڭ تۇسىندىرۋىنە جانە اكىمشىلىك ىقپال ەتۋ شارالارىنا قاراماستان, جەكەلەگەن ادامدار, سونىڭ ىشىندە شەتەلدەن الەۋمەتتىك جەلىلەر ارقىلى حالىقتى الداعى مەرەكەلەردە زاڭسىز ميتينگىلەرگە قاتىسۋعا شاقىرۋدى جالعاستىرىپ جاتىر.
بۇل ادامدار "بەيبىت جينالىستار, ميتينگىلەر, شەرۋلەر, پيكەتتەر جانە دەمونستراتسيالار ۇيىمداستىرۋ مەن وتكىزۋ ءتارتىبى تۋرالى" زاڭنىڭ (بۇدان ءارى - زاڭ) تالاپتارىن ايقىن بۇزادى.
اتاپ ايتقاندا, جوسپارلانعان ميتينگ تۋرالى حابارلانعانعا دەيىن ۇيىمداستىرۋشىلار بەلگىلەنگەن كۇنگە دەيىن 10 كۇن بۇرىن جەرگىلىكتى اتقارۋشى ورگاندارعا جازباشا ءوتىنىش بەرمەگەن.
وندا ولار: ءىس-شارانىڭ ماقساتى, نىسانى, وتكىزىلۋ ورنىن نەمەسە قوزعالىس باعىتتارىن, ونىڭ باستالۋ جانە اياقتالۋ ۋاقىتىن, قاتىسۋشىلاردىڭ بولجامدى سانىن, ۇيىمداستىرۋشىلاردىڭ جانە قوعامدىق ءتارتىپتى ساقتاۋعا جاۋاپتى ادامداردىڭ ساۋالنامالىق دەرەكتەرىن كورسەتىلۋى ءتيىس بولاتىن. بۇل مىندەتتى تالاپتار اكتسيا قاتىسۋشىلارىنىڭ وزدەرىنىڭ, سونداي-اق باسقا دا ازاماتتاردىڭ قاۋىپسىزدىگىن قامتاماسىز ەتۋ ءۇشىن عانا باعىتتالعان.
سونىمەن قاتار رۇقسات العانعا دەيىن ۇيىمداستىرۋشى مەن باسقا دا تۇلعالاردىڭ ميتينگ تۋرالى جاريالاۋعا, وعان قاتىسۋعا شاقىرۋعا, سونداي-اق وسى ماقساتتا پاراقشالار, پلاكاتتار جانە باسقا دا وسىنداي ماتەريالداردى دايىنداۋعا جانە تاراتۋعا قۇقىعى جوق ەكەنىنە نازار اۋدارامىز. باسقاشا ايتقاندا, 16 جەلتوقساندا زاڭسىز اكتسيالاردى ۇيىمداستىرۋشىلاردىڭ ءىس-ارەكەتتەرىندە اكىمشىلىك قۇقىق بۇزۋشىلىق بەلگىلەرى بايقالادى (اكىمشىلىك قۇقىق بۇزۋشىلىق تۋرالى كودەكستىڭ 488-بابى – بەيبiت جينالىستاردى ۇيىمداستىرۋ جانە وتكiزۋ ءتارتiبi تۋرالى زاڭنامانى بۇزۋ).
ەگەر بۇل ارەكەتتەر ازاماتتاردىڭ, ۇيىمداردىڭ, قوعامنىڭ نەمەسە مەملەكەتتىڭ قۇقىقتارى مەن زاڭدى مۇددەلەرىنە ەلەۋلى زيان كەلتىرسە, وندا قىلمىستىق جاۋاپتىلىق تۋىندايدى (قىلمىستىق كودەكستىڭ 400-بابى – سانكتسيالانباعان اكتسيانى ۇيىمداستىرۋ نە وعان قاتىسۋ, ەگەر ولار ەلەۋلى زالال كەلتىرسە).
اكىمشىلىك جانە قىلمىستىق-قۇقىقتىق شارالار وسىنداي اكتسيالاردى قولدايتىن ادامدارعا قاتىستى دا بىردەي دارەجەدە قولدانىلاتىن بولادى. وسىعان بايلانىستى باس پروكۋراتۋرا ارانداتۋشىلىق جاساماۋعا, قولدانىستاعى زاڭنامانى مۇلتىكسىز ساقتاۋعا جانە زاڭسىز ميتينگىلەرگە قاتىسۋدان باس تارتۋعا شاقىرادى" دەلىنگەن ۆەدومستۆو حابارلاماسىندا.