جەتى سپورت ءتۇرىن قامتىعان كونفەدەراتسيا كۋبوگى – رەسپۋبليكامىزداعى ەڭ ءىرى جارىستاردىڭ ءبىرى ءارى بىرەگەيى. جۇلدە قورى 165 ميلليون تەڭگەنى قۇرايتىن وسى دودادا دارالانۋدى ءاربىر كوماندا ارماندايدى.
اۋەلدە رەسپۋبليكامىزدىڭ بىرقاتار ايماقتارىندا كونفەدەراتسيا كۋبوگىنىڭ ىرىكتەۋ سايىستارى ءوتتى. وعان 14 وبلىس پەن نۇر-سۇلتان, الماتى جانە شىمكەنت قالالارى قاتىستى. ولاردىڭ بارلىعى جەكە-جەكە كوماندا جاساقتاپ, جارىس جولىندا جەڭىسكە جەتۋ ءۇشىن بارىن سالدى. ارالارىنان ۇزدىك شىققاندارى الاتاۋ باۋرايىندا باس قوسىپ, ايتۋلى جارىستىڭ باس جۇلدەسى ءۇشىن تالاستى.
سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسى ۇيىمداستىرعان ءدۇبىرلى دودانىڭ شەشۋشى سايىستارى تاياۋدا الماتىداعى بالۋان شولاك اتىنداعى مادەنيەت جانە سپورت سارايىندا ءوتتى. سول جارىستا الماتى قالاسىنىڭ سپورتشىلارى تاماشا ونەر كورسەتتى. ولار ەكى التىن, ءبىر كۇمىس جانە ەكى قولا مەدالدى يەلەندى. جۇلدەلەر ساپاسى جانە سانى جاعىنان بۇل كونفەدەراتسيا كۋبوگىنا قاتىسۋشىلار اراسىنداعى ەڭ ۇزدىك كورسەتكىش. بارەكەلدى, الماتى!
تارقاتىپ ايتساق, الماتى قالاسىنىڭ قۇراما كومانداسى تاەكۆوندوشىلار مەن كاراتەشىلەر سايىسىندا قارسىلاس شاق كەلتىرمەي, ءبىرىنشى ورىندى ولجالادى. قازاق كۇرەسىنەن وتكەن جارىستىڭ فينالىندا عانا ۇتىلىپ, ەكىنشى ساتىعا تابان تىرەدى. ال ەركىن كۇرەس پەن گرەك-ريم كۇرەسى شەبەرلەرى ءۇشىنشى ورىندى يەلەندى.
بيىلعى جىلى كونفەدەراتسيا كۋبوگى جولىنداعى جارىستا الماتى قالاسى وتە تاماشا ونەر كورسەتتى. ءبىز سپورتتىڭ بەس تۇرىنەن دە جۇلدە الدىق. ارينە, بۇنى كەزدەيسوقتىق دەپ باعالاۋعا بولمايدى. سەبەبى, الاتاۋ باۋرايىنداعى اسەم شاھاردا وسى سالانى دامىتىپ, ودان ءارى وركەندەتۋ ءۇشىن كوپتەگەن يگى شارالار جۇزەگە اسىرىلۋدا. ءبىراز جىلدان بەرى ەلباسىنىڭ «رۋحاني جاڭعىرۋ» باعدارلاماسى, ءوزىمىزدىڭ «سپورتتىق الماتى», «سپورت مەنىڭ اۋلامدا» جانە تاعى باسقا جوبالار بويىنشا جۇمىستار ناتيجەلى جۇرگىزىلۋدە. وسى ورايدا, سپورتشىلار قاۋىمىنا بارىنشا قولداۋ كورسەتىپ وتىرعان الماتى قالاسىنىڭ اكىمى باقىتجان ساعىنتاەۆقا زور ريزاشىلىعىمىزدى بىلدىرەمىز, - دەيدى قالالىق سپورت باسقارماسىنىڭ باستىعى رۇستەم بايسەيىتوۆ.