ەلباسىنىڭ باستاماسىمەن جاريالانعان جاستار جىلى ءساتتى اياقتالدى. پرەزيدەنت قاسىم-جومارت توقاەۆ ۆولونتەر جىلىنىڭ باستالۋى راسىمىنە ارنالعان شارادا سويلەگەن سوزىندە «ەلگە قىزمەت ەتۋ تەك ءبىلىمدى عانا ەمەس, نامىستى دا تالاپ ەتەدى. جاس ۇرپاقتىڭ ار-نامىسى جوعارى بولسا, مەملەكەتىمىزدىڭ مارتەبەسى بيىك بولادى» دەپ اتاپ كورسەتتى. جاستار جىلىندا وسكەلەڭ ۇرپاقتى قولداۋ ءۇشىن كوپتەگەن جۇمىس اتقارىلدى.
بيىل جاستار جىلىنا وراي ۇيىمداستىرىلعان ءىس-شارالاردىڭ باسى-قاسىندا بولعانىما قۋانامىن ءارى ماقتان تۇتامىن. «بولاشاق» قاۋىمداستىعى جاستارىمىزدى جان-جاقتى دامىتۋعا ارنالعان بىرقاتار رەسپۋبليكالىق جوبانى جۇزەگە اسىردى. ولاردىڭ قاتارىندا «جاستار – وتانعا!» يننوۆاتسيالىق فەستيۆالى, Bolashaq business forum سەكىلدى ىرگەلى باستامالار بار.
ماسەلەن, نەتۆوركينگ جانە جاستار ۇيىمدارىنىڭ تاجىريبە الماسۋى جونىندەگى جوباعا ەلىمىزدىڭ تۇكپىر-تۇكپىرىنەن 1000-عا جۋىق جاس قاتىستى. بارلىق ءوڭىردى قامتىپ, شارالاردى ۇيىمداستىرۋ بويىنشا ءتيىمدى اقپارات پەن تاجىريبە الماسۋ ءۇشىن ايماقتارداعى ۇەۇ جاستارىنا قولداۋ كورسەتۋدى كوزدەدىك. كەلەشەكتە دە وسى باعىتتاعى جۇمىسىمىزدى جالعاستىرا بەرەمىز.
كەلەر جىلى ەلىمىزدەگى ۆولونتەرلىكتى دامىتۋعا ۇلكەن ۇلەس قوساتىنىمىزعا سەنىمىم مول.
لاۋرا دەمەسىنوۆا,
«Bolashaq» قاۋىمداستىعىنىڭ اتقارۋشى ديرەكتورى