ءونىم مەن ءوسىم ەسەلەندى

ايماقتىڭ اگروونەركاسىپ كەشەنىندەگى ەڭبەك ونىمدىلىگىن جانە ءونىمنىڭ ەكسپورتىن 2,5 ەسەگە ارتتىرۋعا قول جەتكىزۋ ماق­ساتى ورىندالىپ كەلەدى. تارا­تىپ ايتقاندا, ايماقتا مال سانى ءوستى. وتكەن جىلمەن سا­لىستىرعاندا سالانىڭ ونىمدىلىگى ورتاشا 4,5 پايىزعا ۇلعايعان. بۇل ناتيجەگە وبلىستا 102 مال بورداقىلاۋ الاڭى, ونىڭ ىشىندە اسىل تۇقىمدى مال بورداقىلاۋ الاڭدارىنىڭ كوپتەپ اشىلۋى ارقىلى قول جەتتى.

ال وسىمدىك شارۋاشىلىعىندا ءداندى داقىلدار القابى 7 مىڭ گەك­تارعا ۇلعايىپ, جالپى كولەمى 961 مىڭ گەكتاردى قۇرادى. 1,4 ملن توننا ءونىم جينالىپ, داقىل شى­عىمى ورتا ەسەپپەن ءار گەكتار­دان 31 تسەنتنەرگە جەتىپ وتىر. اسى­­رەسە جۇگەرىنىڭ شىعىمى جىل­­دا­عىدان جوعارى. ءتۇسىم گەك­تا­رى­­نا 67 تسەنتنەردەن اينالىپ, بار­لىعى 550 مىڭ توننا ءونىم جينالدى.

– الماتى وبلىسىنىڭ اۋىل­شارۋا­شىلىق سالاسىنداعى جەتىس­تىكتەرى ءبىزدى ۇنەمى قىزىق­تىرا­دى. الايدا, مۇنىڭ ەش قۇ­پيا­سى جوق. جەتىسۋ جەرى كلي­مات­تىق جاعدايى قولايلى, وعان قوسا وبلىس شارۋالارى جۇ­مىس­­تارىن عىلىمعا نەگىزدەپ ۇيىم­داس­­ت­ى­رىپ وتىر, – دەيدى قازاق ەگىن­شىلىك جانە وسىمدىك شارۋ­اشى­لىعى عىلىمي-زەرتتەۋ ينستيتۋ­تىنىڭ پروفەسسورى, قازاقستان ۇلتتىق عىلىم اكادەمياسىنىڭ اكادەميگى عاليوللا مەيىرمان.

اكادەميكتىڭ ايتۋىنشا, وبلىس اگرارشىلارى وتاندىق عا­لىمدارمەن تىزە قوسىپ جۇمىس ىس­تەۋدە. ناتيجەسىندە, وسىمدىك پەن مال شارۋاشىلىعى سالاسى بو­يىنشا ونىمدىلىك جوعارىلادى.

– بۇگىندە جاڭا تەحنولوگيا­نى قولدانۋ ەڭبەك ونىمدىلىگىن ارت­تىرىپ قانا قويماي, اۋىل­شارۋا­شىلىق ءونىمىنىڭ ساپاسىن دا جاقسارتتى. ماسەلەن, «بايسەركە اگرو» سەرىكتەستىگى عالىمدار مەن وندىرۋشىلەردىڭ با­سىن بىرىكتىرىپ, ءبىر-بىرىمەن تى­عىز بايلانىستا جۇمىس ىستەۋى­نە مۇرىندىق بولىپ وتىر. ولار وتاندىق, تمد اۋما­عىن­داعى جانە باسقا دا شەتەلدىك عالىمدارمەن بەلسەندى جۇمىس ىستەيدى. اگروحولدينگ نەگىزىنەن مال شارۋاشىلىعىنا, وسىم­دىك شارۋاشىلىعىنا, الىنعان ءونىمدى تەرەڭ وڭدەۋگە, جىلىجاي شارۋاشىلىعىنا, ومار­تا­شى­لىققا ماماندانعان. ماسە­لەن, شارۋاشىلىقتاعى ءسۇت ءون­دىرىسىنىڭ جىلدىق ءونىمى 3,8-4 مىڭ توننا, وسىمدىك شارۋا­شى­لىعى بويىنشا دا رەكوردتىق كورسەتكىشكە قول جەتكىزدى. اتاپ ايتقاندا, سويا ءوسىرۋ – 79 تسەنتنەرگە, تامشىلاتىپ سۋارۋ ارقىلى وسىرىلگەن جۇگەرىنىڭ شىعىمى – 185 تسەنتنەرگە دەيىن كوبەيدى, – دەيدى ع. مەيىرمان.

ايتپاقشى, وبلىستا ۇز­دىك ناتيجە كورسەتكەن فەرمەر­دى قۇر­مەتتەۋ ءىسى داستۇرگە اينالعان. بيىل دا ايماقتىڭ اۋىل­شا­رۋا­­شىلىق قىزمەتكەرلەرى وبلىس ورتالىعىندا وتكەن جيىن­عا كەلىپ, ەسەپتى جىلدى قورى­تىندىلادى. تابىسى تاسىعاندار وبلىس اكىمىنىڭ ماراپاتىن الىپ, ۇزدىكتەرگە سۋ جاڭا تراكتوردىڭ كىلتى تاپسىرىلدى. بارلىعى جەت­پىستەن استام ەڭبەككەرگە «ەڭبەك ارداگەرى» مەدالى, «اۋىل شا­رۋا­شىلىعى سالاسىنىڭ ۇز­دىگى» توسبەلگىسى جانە اۋىل شارۋا­شىلىعى مينيسترلىگىنىڭ, وبلىس اكىمىنىڭ قۇرمەت گراموتالارى مەن العىس حاتتارى تابىستالدى.

ىلە اۋدانىنداعى «وڭالباەۆ» شارۋا قوجالىعى مەن تالعار اۋدانىنداعى «بايسەركە-اگرو» سەرىكتەستىگىنىڭ جەتەكشىلەرىنە سۋ جاڭا «متز-82.1» تراكتورلارى سىيعا بەرىلدى. سونداي-اق قاراساي اۋدانىنداعى «وڭ­تۇستىك» اگروپاركى مەن كەگەن اۋدانىنداعى ء«مادي» شارۋا قوجالىعى 600 جانە 500 مىڭ تەڭ­گەنىڭ سەرتيفيكاتىنا يە بولدى. وسىنداي ماراپاتقا كوكسۋ­لىق «بالپىق» جانە رايىمبەك اۋدانىنداعى «وركەن» شارۋا قوجالىقتارى دا لايىق بولىپ, 500 جانە 400 مىڭ تەڭگەنىڭ سەرتيفيكاتتارىن الدى.

الماتى وبلىسى