كاسىپقوي بوكستاعى ەكى بىردەي وتانداسىمىز – باتىر جۇكەمباەۆ پەن جانىبەك ءالىمحان ۇلى بۇكىلالەمدىك بوكس كەڭەسىنىڭ (WBC) رەيتينگىندە جوعارىلادى.
ورتا سالماقتاعى جانىبەك ءالىمحان ۇلى (8-0,4 كو) ەكى ساتى كوتەرىلىپ, 13-ورىنعا جايعاستى. قانداسىمىز ەڭ كەيىنگى جەكپە-جەگىن قاراشا ايىندا اقش-تىڭ فرەسنو قالاسىندا كانادالىق البەرت ونولۋنوسەمەن (24-3-1,8 كو) وتكىزىپ, نوكاۋتپەن جەڭگەن-ءدى. سونداي-اق WBC Continental Americas جانە WBO Global بەلدىگىن قورعاعان بولاتىن.
سونىمەن قاتار ءبىرىنشى ورتا سالماقتاعى WBA Continental جانە IBF Inter-Continental بەلبەۋىنىڭ يەگەرى باتىر جۇكەمباەۆ (17-0,13 كو) 11-ورىنعا تۇراقتادى. جۇكەمباەۆ قازىرگە دەيىنگى سوڭعى جەكپە-جەگىن قىركۇيەك ايىندا كانادادا وتكىزىپ, مەكسيكالىق ميگەل ۆاسكەستى (41-8, 15 كو) ۇپاي سانىمەن جەڭگەن ەدى.